Lubhalwe nguDylan Bettencourt
Ikomidi lezemidlalo ePhalamende lifuna iSafa iphendule ngephutha elenze uTeboho Mokoena edlala ngesikhathi emisiwe emdlalweni wokuhlungela iNdebe yoMhlaba.
USihlalo weKomidi uJoseph McGluwa uthe iSafa kumele ibhekane nemibuzo ngaphambi kukaZibandlela, exwayisa ngokuthi lolu daba ngeke luvele luphele nje.
Inhlangano eyengamele ibhola kuleli, iSouth African Football Association (Safa) ibizelwe ePhalamende ukuthi izochaza ukuthi kwenzeka kanjani umdlali omisiwe acishe alahlekisele iBafana Bafana neNdebe yoMhlaba.
Lokhu kuza ngemuva kokuthi umdlali wasesiswini uTeboho Mokoena efakwe emdlalweni wokuhlunga neLesotho nakuba emisiwe ngemuva kokuthola amakhadi aphuzi emidlalweni yangaphambilini bedlala ne-Nigeria ne-Zimbabwe.
I-Fifa ijezise iNingizimu Afrika ngokukhipha amaphuzu amathathu, nokuyinto ebeke engozini kafushane ekutheni iBafana ingene eNdebe yoMhlaba ka-2026.
Yize iBafana isakwazile ukungena kodwa iPortfolio Committee on Sport, Arts and Culture ePhalamende ithi leli phutha ngeke lingaxazululwa.
Usihlalo wekomidi uJoseph McGluwa utshele uThabiso Mosia weRadio 2000 ukuthi iSafa kumele ivele phambi kwekomidi noma ngabe kwenziwa uZoom kodwa lokho kumele kwenziwe ngaphambi kukaZibandlela.
“ISafa kumele ifike ngoba ngeke iphunyuke kalula nje,” kusho uMcGluwa. Khona-ke kwakuyokwenzekani? Kumele basinikeze izimpendulo.”
Ikomidi lifuna incazelo egcwele ngokuthi leli phutha lenzeke kanjani nokuthi yiziphi izinyathelo ezizothathwa ukuze lingaphinde lenzeke.
Imenenja yeqembu leBafana uVincent Tseka isolwa ngaleli phutha, abanye sebeveze ukuthi kumele asule esikhundleni. Lowo OwayenguMengameli weSafa, uDanny Jordaan, uthe udaba seluvaliwe.
Kodwa iPhalamende liyaphikisana nalokho kanti iSafa kuzomele iphendule imibuzo enzima ngaphambi kokuphela konyaka.
Esithombeni esingenhla: UDanny Jordaan.
Umthombo wesithombe: Ifayela