Dylan Bettencourt
I-Los Angeles Angels ivulelwe icala lobudedengu ngemuva kwesigameko sokuthi i-baseball ebingaphoswanga kahle ishaye umfanyana ekhanda, yahlakaza ugebhezi yaphinde yalimaza ubuchopho bakhe.
UBryson Galaz wayeneminyaka eyisithupha ubudala ngesikhathi ehamba nomndeni wakhe beya ezihlalweni zabo ngesikhathi amaqembu ezifudumeza. Eduze kwabo uMiddleton wase-Kenya waphosa ibhola. Lavele laphambuka lashaya umfanyana ekhanda.
Icala lichaze ukuthi uBryson waphuthunyiswa esibhedlela esesimweni esibucayi.
Ngemuva kokuthi aphume esibhedlela, umndeni wathi indodana yawo inenkinga yokugxila esikoleni kanye neyokuxhumana nabantu.
Ukuhlolwa kwezokwelapha kwembula ukusebenza kobuchopho okungavamile, kanti lokho kwandisa ukwesaba kokuthi uBryson uzophazamiseka kakhulu uma ekhula.
“Izinsuku ezintathu, sasingazi ukuthi indodana yami izophila noma izoshona,” kusho umama kaBryson, uBeatrice Galaz esitatimendeni.
“Siyabonga ukuthi wasinda, kodwa kusukela ngalolo suku ubelokhu ezabalaza esikoleni. Akafani njengakuqala.”
Icala elifakwe kule nyanga enkantolo ephakeme yase-Orange County, lichaze ubudedengu ohlangothini lwe-LA Angels, lithi iqembu lalingenza kangcono ngokufaka inethi eyengeziwe ezinhlangothini lapho abalandeli abahamba khona.
Lengeze ngokuthi iqembu likhuthaza abalandeli ukuthi basheshe beze emidlalweni ukuze bahlangane nabadlali futhi bahlanganyele kanye nabadlali uma bezifudumeza, umndeni unomuzwa wokuthi kuningi okumele kwenziwe ukuze kugwenywe isigameko esifanayo.
Ummeli womndeni uKyle Scott uthe lesi sigameko besingagwemeka kalula.
“Okwakumele bakwenze ukushintsha indlela abenza ngayo. Akuyona into engalindelekile ukuthi othile uzogeja ibhola, futhi lizophonswa kanzima ngokwanele ukulimaza umuntu,” etshela i-Los Angeles Times.
Ithimba lithe belingakathintwa ngokusemthethweni mayelana naleli cala.
“Akekho osasithintile ngaleli cala. Saziswe ngabezindaba ngalokhu ngakho asikwazi ukuphawula okwamanje,” kusho okhulumela i-Angels uMarie Garvey.
Umthombo wesithombe: @VoiceOfOC
.
