Lubhalwe nguCelani Sikhakhane
Ukugula kukamengameli weqembu elihlubuke kuNFP okuyi-Allied Movement 4Change sekuphoqe ukuba isigungu esiphezulu sijube usihlalo walo waKwaZulu-Natal ukuba akhe izinhlaka ezweni lonke ukulungiselela ukhetho luka-2026.
Lokhu kuthiwa kwenzeke ngesonto eledlule ngemuva kokubona isimo sikaMengameli weqembu uMnuz Ahmed Manzoor Sheik Imam okuthiwa namanje kubonwa ngokusa kuye esibhedlela.
Kuthiwa washaywa isifo senhliziyo okubukeka sengathi sihambisana nohlangothi.
Kube sekuqokwa uNkk Sindi kaMaphumulo-Mashinini ukuba athathe izintambo zokwakha izinhlaka kuzwelonke nobekungumsebenzi kaManzoor abewukhuthalele.
IScrolla.Africa sithole ukuthi uManzoor washawa isifo senhliziyo ngemuva kwemiphumela yokhetho ebenze abangasithola isihlalo ePhalamende eKapa naseSishayamthetho KwaZulu-Natal.
Kuthiwa ugcine eyohlinzwa kwesinye sezibhedlela eziseThekwini ngenxa yokuthi isimo sakhe sifana naleso sowayenguMengameli weNFP uNkk Zanele kaMagwaza-Msibi sango-2014 mhla eshawa isifo sohlangothi ekwakhe eNewcastle.
Umndeni kaManzoor kuthiwa usuvale ngisho abaholi nabangani ukuba bazombona.
OkaMaphumulo-Mashinini ethintwa iScrolla.Africa ukuqinisekisile ukuthi isigungu seqembu sivumelene ukuthi akathathe izintambo zokwakha izinhlaka zeqembu kuzwelonke.
“Isigungu seqembu sivumelene ukuthi nakuba umengameli engaphilile okwamanje kodwa asiqhubeke nomsebenzi abewudinga wokuba kwakhiwe izinhlaka zeqembu ezifundazweni ezahlukene ukulungiselela ukhetho lwango-2026.
“Yize ngiwusihlalo waseKZN kodwa ngikwamukele ukujutshwa iqembu lethu. Ngikhuluma nje ngibheke esifundazweni iMpumalanga lapho okuzothi maduze ngibenomhlangano wokwakha izinhlaka zakhona,” kusho okaMaphumulo-Mashinini.
Uqhube wathi okunye akuhlelayo ukuqinisa izinhlaka zaseKZN bese ebanombuthano wokuba iqembu libonge ukwesekwa kwalo okhethweni nakumavolontiya abezinikele.
Uthe ezinye izinhlelo abanazo ukuthi bazophinde bagxile naseGauteng okuyilapho befuna ukuqinisa khona ngoba baningi abantu abafuna ukujoyina abaqhamuka emaqenjini ahlukene, ikakhulukazi iNFP abahlubuke kuyo.
UMaphumulo-Mashinini uthi uzishaya isifuba ukuthi iqembu labo i-AM4C likwazile ukuthola amavoti angaphezulu kuka-7 900 yize belinezinyanga ezimbili lisunguliwe ngesikhathi kuyiwa okhethweni.