Lubhalwe nguZukile Majova noDoreen Mokgolo
Kube nezinxushunxushu ngosuku lokuqala lwengqungquthela yokukhetha ubuholi be-ANC e-Nasrec eGoli njengoba izithunywa ezingaphezu kuka-800 zichithwe yi-computer.
Zingaphezu kuka-200 izithunywa ebezingakabhaliswa ngehora lesine ntambama nokuyinto emise ingqungquthela.
Izithunywa ebezithukuthele zigane unwabu esikhungweni sokubhalisa sengqungquthela e-Unisa e-Ormonde ziphoqe ukuthi zingene kulesi sikhungo ngenxa yokudinwa.
Bekulindeleke ukuthi ingqungquthela iqale ngo-8:30 ngombiko weqembu kaMengameli uCyril Ramaphosa.
Ezinye zezithunywa ebezibhajwe esangweni beziphuma eMpumalanga, e-Eastern Cape nase-North West.
Izithunywa zitshele i-Scrolla.Africa ukuthi bezilokhu zilinde ukugunyazwa kwazo kusukela ngo-5 ekuseni kanti ezinye zithi zilale kulesi sikhungo ngoLwesine ebusuku.
Okhulumela i-ANC uMnu Pule Mabe, uthe bamatasatasa ukuze kuqinisekiswe ezinye zezithunywa.
“Lezi zithunywa ngeke zivunyelwe ukubamba iqhaza,” engeza.
Lesi siphakamiso senze izinto zaba zimbi kakhulu njengoba besinamandla okunciphisa kakhulu isibalo sezithunywa ezivota nokufaka ingqungquthela emacaleni.
UMabe uthe abantu kukhona nabanye abaphikwe I-computer ngoba bebengayikhokhi imali yobulungu, wengeza ngokuthi kulabo kukhona nabagaqele ukungena kwisigungu esiphezulu seqembu.
UMnu Nkululeko Nkos, obekhungathekile waseMpumalanga, uthe ngeke bavume ukuthi iqale ingqungquthela kuze kube zonke izithunywa ezizovota ziyacutshungulwa.
“Silambile, somile futhi sikhathele kodwa sizolwa size sithole ilungelo lokuba ingxenye yengqungquthela.
“Sinikezwe igunya lokumela izifunda nezifundazwe zethu, kumele sibe ingxenye yazo,” engeza.
Esithombeni esingenhla: Amakhulu ezithunywa ezizovota ezivela e-Eastern Cape, e-North West nase-Limpopo ezilinde ukugunyazwa
Umthombo wesithombe: Sithunyelwe