Lubhalwe nguMichael Madyira
Umqhudelwano we-MTN8 ka-2024 uzoqala kule mpelasonto ngemidlalo emibili ethokozisayo yama-quarter-final ngoMgqibelo nangeSonto.
NgoMgqibelo, i-Orlando Pirates evikela isicoco izobhekana neSuperSport United e-Orlando Stadium.
IPirates, ehlose ukunqoba isicoco okwesi-13, iyiqembu lesibili eliphumelele kulo mqhudelwano, ilandela iKaizer Chiefs, esinqobe izikhathi ezingu-15.
IChiefs nokho ngeke idlale kulo nyaka njengoba iqede endaweni yeshumi ku-PSL ngesizini edlule.
Liyaqhubeka isasasa langeSonto, njengoba iStellenbosch izokwamukela iTS Galaxy e-Danie Craven Stadium.
Lo mqhudelwano uzoma kancane ngaphambi kokuthi ubuye ngempelasonto ezayo, lapho iSekhukhune United izodlala neCape Town City ePeter Mokaba Stadium ngomhlaka- 10 kuNcwaba
Abaqede isibili ngesizini edlule, iMamelodi Sundowns, izobhekana nePolokwane City eLucas Moripe Stadium ngakusasa.
Amehlo athe njo kuPirates ukubona ukuthi ingayinqoba yini i-MTN8 isizini yesithathu ilandelana ngaphansi komqeqeshi uJose Riveiro.
Ukaputeni wePirates u-Innocent Maela uqaphile ngomdlalo wabo neSuperSport United.
“Sibheke ngabomvu ukuqala isizini ngenothi elihle,” kusho uMaela.
“ISuperSport United iyiqembu elinzima kakhulu. Ukudlala nabo akulula neze, futhi ngeke sibathathe kancane.”
ISuperSport United iwine isicoco se-MTN8 kathathu, kwathi iSundowns yasinqoba kane.
ICape Town City inesicoco esisodwa se-MTN8, kanti amanye amaqembu kulo mqhudelwano awakaze awine.
Esithombeni ngenhla: Owamanqamu we-MTN8 yango-2023 phakathi kwe-Orlando Pirates neMamelodi Sundowns
Umthombo: Orlando Pirates