Menzi Magubane
Igama le-Orlando Pirates lizobonakala ku-draw yama-quarter final e-CAF Confederation Cup ngoLwesihlanu e-Cairo, eGibhithe.
Lo mqhudelwano uzobandakanya iMamelodi Sundowns kanye neKaizer Chiefs abalinde ukubona ukuthi bazoqhathwa nobani abokugcina kwabayisishiyagalombili.
Amabhakabhaka acishe azikhipha embangweni ngoLwesithathu ebusuku ngokulahlekelwa umdlalo wayo wokugcina ka-Group A ngo-1 -0 ngesikhathi bebhekene ne-Enyimba e-Nigeria ngoLwesithathu ebusuku, kodwa i-ES Setif eshaye i-Al Ahly Benghazi isize amaBhakabhaka ukuthi adlulele kwabayisishiyagalombili.
IPirates izovulelwa ithuba lokudlala ndawonye neCoton Sport yase-Cameroon, iCS Sfaxien yase-Tunisia nePyramid yaseGibhithe.
Bazoqhathwa namaqembu anqobile kanti lawo maqembu yi-Enyimba yase-Nigeria, iJS Kabylie yase-Algeria, i-ASC Jaraaf yase-Senegal neRaja Casablanca yase-Morocco.
Umlenze wokuqala wama-quarter final uhlelelwe umhla zi-15 no-16 kuNhlaba kanti kuzobuywa mhla zingama-22 no-23 kuNhlaba. Amabhakabhaka azodlalela ekhaya kuqala nanoma yiliphi iqembu abazodlala nalo ngokulingana.
Ama-quarter final azoba eyindawo ejwayelekile kumaBhakabhaka avela okokuqala ngowe-2015, aqeda njengabaphume isibili ngemuva kokuhlulwa yi-Etoile du Sahel yase-Tunisia kowamanqamu.
Amabhakabhaka azozimisela kulo mdlalo obalulekile we-DStv Premiership uma esetholana phezulu neSundowns, e-Orlando Stadium ngehora le-3 ntambama ngeSonto.
Umthombo wesithombe: @orlandopirates
.
