Lubhalwe nguCelani Sikhakhane
UMntwana uZuzifa Buthelezi, ongumholi omkhulu wesizwe sakwaButhelezi, ucela uHulumeni enze okuthe xaxa ukuvikela amakhosi aKwaZulu-Natal ngemuva kwezigameko zokubulawa kwabantu muva nje.
INduna, uSibongiseni Wilson Buthelezi, udutshulwe wabulawa ngaphandle komuzi wakhe oLundi ngoMsombuluko ekuseni. Ubezoya enkantolo yesizwe esigodini sasoNcweleni.
Lesi sigameko sokudubula senzeke ngemuva kwezinsuku ezintathu kubulawe induna uJoyce Mokgosi ngaseNewcastle.
UMntwana uZuzifa uthe kuyinkinga ukuhamba kancane kokuboshwa kwalabo ababulala amakhosi.
“Sesilahlekelwa yithemba ngohlelo lwezobulungiswa ezweni,” usho kanje.
“Umuntu angabulawa esigodini esincane kangaka lapho wonke umuntu azana khona, kodwa akukaboshwa muntu, nophenyo alukabi nenqubekela phambili.”
Uthe abaholi bendabuko baphila ngokwesabela izimpilo zabo.
Osopolitiki baKwaZulu-Natal sebehlangene ukuzama ukuxazulula le nkinga kodwa ukubulawa kwabantu kusaqhubeka.
Ngasekuqaleni kwaleli sonto, uSiphamandla Ntombela weNational Freedom Party uthe abaholi bendabuko bahlaselwa kanzima kodwa abanazo ezokuphepha.
“Osopolitiki bahlinzekwa ngezokuphepha kuphinde kwenziwe isiqiniseko nokuthi nemizi yabo iphephile,” usho kanje.
Ngo-2023, omasipala baseKZN bachitha u-R18-million ezinyangeni eziyisithupha kuphela beqasha onogada bosopolitiki namakhosikazi abo.
Ngonyaka odlule, umasipala wesifunda sasoThukela onenkinga yezimali wasebenzisa imali cishe engu-R10-million ezinyangeni ezingu-14 uqasha onogada bamakhansela.
Ngo-2019, umasipala waseMvoti uthe ususebenzise imali elinganiselwa ku-R11.86-million ukuvikela imeya yawo kusukela ngo-2016 kanye no-R4.6-million wokuvikela izimenenja eziphezulu.
Esithombeni esingenhla: INkosi uZuzifa Buthelezi waKwaPhindangene ukhathazekile ngokuphepha kwabaholi bomdabu baseKZN.
Umthombo: Ihhovisi likaMengameli waseNingizimu Afrika