Menzi Magubane
I-South African Football Association (Safa) iziqhelelanisile nokuveza ukuthi azovulwa nini amasango ezinkundleni zemidlalo.
Inhlangano kanobhutshuzwayo isidlulisele umthwalo kwi-Premier Soccer League (PSL), yathi yibo okumele bakhulume nohulumeni ngalolu daba.
Lokhu kuza ngemuva kokuthi abalandeli bebhola bememezele ukuthi bahlele imashi yokuphoqa uHulumeni ne-SAFA ukuthi ibavumele babuyele ezinkundleni. Imashi ihlelelwe umhlaka-5 kuNdasa e-Orlando Stadium.
Kuzobe sekusele amahora ambalwa ngaphambi komdlalo we-Soweto Derby phakathi kwe-Orlando Pirates ne-Kaizer Chiefs enkundleni efanayo.
Abalandeli bakhomba i-SAFA kanye nohulumeni ngokumisa ukubuyela kwabo enkundleni, kodwa inhlangano eyengamele ibhola lezinyawo ithi lolu daba alikho ezandleni zabo.
“I-PSL kumele ifake isicelo kuNgqongqoshe wezemidlalo ukuze kubuye abalandeli enkundleni. Akumele thina njenge-SAFA senze lokho egameni labo. Ngakho lolu daba alukho ezandleni zethu,” kusho i-Chief Operationing Officer ye-SAFA uLydia Monyepao etshela i-Sowetan.
I-SAFA ike yawahlola amanzi ngobhoko ngesikhathi ivumela ingxenye yabalandeli abagonyiwe enkundleni ngesikhathi iBafana Bafana ibhekana ne-Ethiopia ne-Zimbabwe ngoMandulo odlule.
I-PSL yenze okufanayo ekuqaleni kwesizini esikuyo ngesikhathi i-Mamelodi Sundowns idlala ne-Cape Town City kowamanqamu we-MTN8 ngoMandulo.
“Ubonile ukuthi sibavulele abalandeli emidlalweni yeBafana Bafana,” kwengeza uMonyepao.
Abalandeli bacikwa ukuthi eminye imidlalo efana nebhola lombhoxo negalofu ivumele abalandeli babo ukuthi bangene ezinkundleni.
“Kuyakhathaza kakhulu futhi kuyasihlupha emoyeni ukuthi i-PSL iyona yodwa imboni yezemidlalo engafuni ukuthatha ngisho nalabo balandeli abangu-2 000,” kusho uSuyabulela Loyilane, oyi-Chief Executive Officer ye-National Football Fans Association.
“Abalandeli bebhola lombhoxo sebevumelekile manje. Kuyadabukisa ngoba wonke amazwe emhlabeni manje asevumele abalandeli ukuthi babuyele ezinkundleni. Yithi kuphela esingavunyelwe. I-PSL kufanele okungenani isebenzise umthetho wabalandeli abangu-2 000 ukuze ibone ukuthi yini esebenzayo nengasebenzi,” kwengeza uLoyilane.
ULoyilane unxuse abathandi bebhola ukuthi bangenele umbhikisho onokuthula, wathi inhloso ukukhombisa i-PSL nohulumeni ukuthi babone okufunwa abalandeli njengoba befuna ukubuyela ezinkundleni ngaphambi kokuthi isizini iphele ngoNhlaba.
Umthombo wesithombe: @TimesLIVE
.
