Lungani Zungu
INkantolo yoMthethosisekelo isichithile isicelo se-DA sokumisa iKhomishini Yokhetho Ezimele (i-IEC) ekubhaliseni kabusha abazomela amaqembu ezepolitiki, yaphinde yavuna iqembu elibusayo.
Iqembu eliphikisayo elisemthethweni liye enkantolo ngemuva kokuthi i-IEC ivule kabusha ukulethwa kwalabo abazongenela ukhetho, kulandela ukuhluleka kwe-ANC ukuletha uhlu lwayo oluphelele lwabazongenela ukhetho ngaphambi komnqamulajuqu.
Amaqembu amaningi, okubalwa kuwo i-DA ne-EFF, asola i-ANC ebusayo ngokuba nomthelela ku-IEC ekuthatheni lesi sinqumo.
I-DA ifake isicelo enkantolo enkulu, iphonsela inselelo i-IEC ngesinqumo sayo sangomhla ziyisithupha kuMandulo sokuvula kabusha ukuphakanyiswa kwalabo abazongenela ukhetho.
UMkhuleko Hlengwa we-IFP uthe i-IEC ihlehlele emuva ukuze ivune i-ANC.
“Imithetho iyimithetho. Asikwazi ukuvumela i-ANC, ngenxa yokuthi iyiqembu elibusayo, yenzelwe umusa ngale ndlela,” kusho uHlengwa.
Umholi we-DA, uJohh Steenhuisen uvumile.
“I-ANC ayikwazi ukunikezwa elinye ithuba, kodwa kuyiyona ehlulekile ukuletha uhlu lwabazongenela ukhetho,” esho.
Umholi we-EFF uJulius Malema uthe lokhu ngeke kuvunyelwe ukuthi kwenzeke ezweni lentando yeningi.
“Abantu baseNingizimu Afrika bazohlupheka ngenxa yokuhluleka kwe-ANC ukubhalisa abazongenela ukhetho ngesikhathi,” esho.
“Kodwa lokhu akuyona into engajwayelekile. I-ANC yehlulekile ukuphatha izwe iminyaka engama-27. Kungani kufanele silindele ukuthi babe yinhlangano esebenza kahle”.
IPhini likanobhala-jikelele we-ANC uJessie Duarte usamukele lesi sinqumo.
“Kusobala ukuthi lokhu kukhulula i-ANC. Umsebenzi wethu manje wukuqinisekisa ukuthi siyaqhubeka nomkhankaso wethu wokhetho”.
Khonamanjalo, amalungu e-ANC avimbele uMalema ukuba akhankase KwaDambuza eKZN, nokuholele ekutheni kube nokuhilizisana okwenzeke ngeSonto.