Celani Sikhakhane
Amakhansela e-ANC axoshelwe ukuhlela itulo namaqembu aphikisayo ukuketula iMeya yasoKhahlamba uVikizitha Mlotshwa abuyiselwe ezikhundleni yiNkantolo eNkulu yaseMgungundlovu.
Lokhu sekuphoqe iKhomishini eZimele yoKhetho (i-IEC) ukuthi ihoxise ukhetho lokuchibiyela esigcemeni sika-12 kuMasipala wasoKhahlamba, e-Bergville, KwaZulu-Natal, obekumele lube ngoNhlangulana.
UMlotshwa ubesolwa ngokuqola uMasipala wasoKhahlamba e-Bergville u-R1.4 million, owawubekelwe ukwenza umcimbi woSuku Lwamalungelo Abantu.
Uphinde wasolwa ngokweba imali kamasipala ukuze akhokhele umshado wakhe wesintu othathe izinsuku ezintathu ngoMasingana.
Amakhansela amabili e-ANC uMnu Vusimuzi Wiseman Mazibuko noMnu Musawenkosi Moses Hadebe baxoshwe kwamasipala naseqenjini ngenxa yokusebenzisana namakhansela e-IFP nawe-DA ukukhipha uMlotshwa we-African Peoples Movement Organisation (Apemo) esebenzisana ne-ANC.
Lesi sinqumo senkantolo, siphoqe i-IEC ukuthi ihoxise ukhetho lokuchibiyela. Siphinde sayalela i-ANC noMasipala wasoKhahlamba ukuthi babuyisele uMazibuko noZakwe ezikhundleni zabo.
UNobhala we-ANC esifundeni uBheki Khanyile utshele i-Scrolla.Africa ukuthi udaba lusetshwenzwa isigungu esiphezulu seKomiti leSifundazwe.
“Ngakho-ke, i-ANC izokwazi ukunquma indlela eya phambili ngabo ngemuva kwalowo mhlangano wesifundazwe,” kusho uKhanyile.
Ikhansela lesithathu, uGloria Ngozo we-National People’s Ambassador (i-NPA), uzozwa ngoLwesihlanu ukuthi iNkantolo eNkulu izombuyisela yini ngemuva kokuthi iqembu lakhe limxoshe ngoba ubehlela ukuvotela iMeya yasoKhahlamba. Iqembu lakhe lisebenzisana ne-ANC kanye neqembu lemeya i-Apemo.
Umholi we-NPA uMnu Nathi Mthethwa uthe bazolinda isinqumo senkantolo ngoLwesihlanu ukuze banqume indlela eya phambili.