Lubhalwe nguSihle Mavuso
INkantolo eNkulu yaseThekwini isibambile isinqumo sayo mayelana nesicelo se-ANC sokuphikisa isinqumo sangoMbasa esivumela i-MK Party ukuthi isebenzise igama nophawu lweMK eyabe iwuphiko lwezempi lwe-ANC.
IJaji uMahendra Chetty akazange asho ukuthi isinqumo sizokhishwa nini.
Ummeli we-ANC, u-Adv Gavin Marriot, uthe ukusebenzisa kwe-MK Party lolu phawu kuzodida abavoti. Wathi kuzodala izinkinga ngesikhathi sokhetho izingqungquthela neminye imicimbi.
UMarriot ucele iJaji uChetty ukuthi abavumele badlulisele icala eNkantolo eNkulu yokuDluliswa kwamaCala (SCA), wathi enye inkantolo ingase ikhiphe isinqumo esihlukile.
Ummeli we-MK Party, u-Adv Dali Mpofu SC uthe i-ANC izama ukulilungisa kabusha icala abahlulwe ngalo ngoMbasa.
Ufanise lesi sicelo njengento efika lapho iyakhona isifile.
“Uma kuke kwaba nesikhalo esingenathemba, yisona lesi,” kusho uMpofu enkantolo.
Uthe ukhetho seluphelile okwenza ukudluliswa kwecala kube yize.
“Umonakalo wenzeka ngesikhathi sokhetho ngeke ukushintshe lokho manje, ihhashi selihlabe ngejubane lahamba nesitimela sesiphumile esiteshini,” kusho uMpofu.
UZuma ubesenkantolo ezolalela lezi zinkulumo.
Abaholi be-ANC KwaZulu-Natal nasehhovisi likazwelonke bebengekho.
Abalandeli be-MK Party bebengaphandle kwenkantolo, kanti abalandeli be-ANC bebengabonwa.
Esithombeni esingenhla: OwayenguMengameli uJacob Zuma, osehola i-MK Party, ubeseNkantolo ePhakeme eThekwini.
Umthombo: Sihle Mavuso