Dylan Bettencourt
Umdlali webhola uVuyo Mere usephumele obala ngezinkinga ake abhekana nazo, wadalula nokuthi wake wacabanga ukuzibulala ngemuva kokuhamba kwi-Mamelodi Sundowns.
UMere oneminyaka engu-37, ungumdlali osehlale isikhathi eside kunabo bonke kwi-Premier Soccer League njengoba afika kulesi sigaba ngo-2001.
Kodwa-ke, ngemuva kweminyaka engu-10, i-Sundowns iye yamkhulula lo mdlali wasemuva kanti wathwala kanzima ukuze athole ithuba lokuya kwelinye iqembu.
UMere uthe akafuni ukubuyela ekhaya abe wumthwalo kubazali bakhe.
“Izinsuku ezimbalwa zadlula kungekho lutho mayelana namakilabhu anentshisekelo ngami. Nganquma ukuthi sekwanele, mangithathe impilo yami,” etshela i-Prime Sports With Mahlatse.
“Angizange ngiphume endlini izinsuku ezimbalwa. Bengivalelekile kwathi ngosuku lwesithathu abanye abafana basola ukuthi kungenzeka kube nenkinga”.
Lo mdlali wasemuva wengeze ngokuthi ushayele abazali bakhe ucingo exolisa “ngokubadumaza” kanti ngaphambi kokuthi umama wakhe aphendule, waluvala ucingo.
“Ngiye ngakhiya indlu. Khona kuyahlekisa manje uma ngicabanga ngakho, kodwa nje ngagcina ngibheka ukuthola indawo lapho ebengingabopha khona intambo endlini yokugezela ukuze ngizilengise,” ebalisa.
“Kodwa unembeza wami wangishaya kakhulu, futhi angizange ngiqhubeke nakho. Cishe ngemuva kwamahora amane kuya kwamahlanu kwabakhona ongqongqoza emnyango wami futhi ngesikhathi ngivula kwakungabazali bami”.
UMere ugcine esayine kwi-Platinum Stars ahlale kuyo iminyaka eyisikhombisa wadlulela kwi-Bidvest Wits wase edlulela kwi-Swallows.
UMere usanda kushiya i-Moroka Swallows kulandela izinkinga zemali kuleli qembu. Njengamanje udlalela i-Galaxy TS esendaweni yesi-14 etafuleni.
Umthombo wesithombe: @SkySports
.
