Menzi Magubane
Isilomo se-Orlando Pirates, uTeboho Tebza Moloi, uthathe isinqumo sokushiya ibhola ukuze athole umsebenzi wokuba ngunjiniyela kagesi.
“Ibhola ngeke lingisekele kuze kube ingunaphakade,” kusho lo mdlali.
UTebza uthe ubevele enothando lobunjiniyela ngakho-ke wanquma ukuthi azitholele iziqu zakhe ngonyaka odlule.
“Ngifunde e-Johannesburg Technical College lapho engenze khona izifundo zami zezinyanga ezintathu,” kusho uTebza.
“Ngahlangana nomngani wami uRaymond Oberholster owangiqinisekisa ukuthi ngijoyine inkampani yakhe. Ngizoqala ngibe inxusa yenkampani, bese engikhombisa okwenziwayo ekugcineni ngizosebenza isikhathi esigcwele enkampanini.”
Ngezinsuku zakhe zokudlala, uTebza wayengumdlali wasesiswini kwi-Orlando Pirates. Waqala ukudlala kuma-Bucs ngo-1987 washiya ngo-1993 wayodlalela i-Gaziantepspor kwi-Turkish Super Lig.
Uke wadlala nase-Colombia lapho adlale khona kwiu-Once Caldas waba ngowokuqala waseNingizimu Afrika ukushaya igoli esigabeni esiphezulu sase-Colombia.
Udlalele iBafana Bafana ngaphambi kokuthatha umhlalaphansi ngo-1997 ukuze abe ngumqeqeshi. Iqembu lakhe lokuqala aliqeqesha lalikwi-Pirates lapho ayeyisekela lomqeqeshi kusukela ngonyaka ka-2001 kuya ku-2016.
Usebenze kwi-Chippa United njengomsizi ngonyaka ka-2017 wabe eseqokwa njengomqeqeshi oyibamba ngonyaka ka-2018. Uphinde waqeqesha i-Buya Msuthu eyayidlala kwi-National First Division ngonyaka ka-2016.
Uke waqeqesha iqembu lesizwe laseNingizimu Afrika labangaphansi kuka-17 kanti umsebenzi wakhe wokugcina wokuqeqesha waba ngonyaka ka-2020 lapho acija khona ama-Super Eagles kwi-ABC Motsepe League.
Ngemuva kokungabi nomsebenzi wokuqeqesha kusukela ngonyaka ka-2020 uTebza kudingeke ukuthi athathe isinqumo esingcono ngekusasa lakhe.
Umthombo wesithombe: @SoccerLaduma