Injabulo kumsubathi wakuleli eyogijima kwi-Boston Marathon 

Lubhalwe nguThathe Msimango

Umsubathi wakuleli uMelikhaya Frans ujabulele ukufakwa emkhakheni wezinga eliphezulu lwe-Boston Marathon ehlelelwe umhlaka-17 kuMbasa.

I-Boston Marathon umjaho omdala kunayo yonke emhlabeni futhi ubalwa njengeminye yemidlalo eyaziwa kakhulu emhlabeni. Ingeminye yemijaho eyisithupha ye-World Major Marathon ehambisana ne-London, i-Berlin, i-Chicago, i-New York kanye ne-Tokyo marathon.

Phakathi kohlu lwabasubathi abahamba phambili olumenyezelwe abahleli kukhona u-Eluid Kipchoge wase-Kenya, ophethe irekhodi lomhlaba ebangeni lomjaho.

UMelikhaya Frans (33) okwi-SA Half Marathon Champion uthe namanje akakakholwa.

“Ngiyajabula ukumenywa emjahweni omkhulu njengalona. Le yinto ebengiyifisa kusukela ngaqala ukugijima,” etshela i-Scrolla.Africa.

“Ithuba lokugijima noKipchoge liyingqayizivele futhi lifiswa noma imuphi umsubathi.

Sekuzoba okwesibili ngihlanganyela naye njengoba ngagijima naye ku-London Marathon ka-2020. Angisakwazi ukulinda ukuphinde ngigijime naye.”

Kuze kube namuhla umgijimi wakuleli kuphela obambe iqhaza e-Boston izikhathi eziningi nguLusapho April, owagijima izikhathi ezintathu. Bobabili uFrans kanye no-April bavela e-Eastern Cape.

UFrans uthe uthole ulwazi oluningi ekuzuzeni kwakhe.

“Ngimhlonipha kakhulu u-April nalokho akuzuzile emsebenzini wakhe. Waphuma endaweni yesithathu ku-New York Marathon ngonyaka owodwa futhi ngifuna ukulingisa impumelelo yakhe,” kusho uFrans ophethe irekhodi lakuleli ku-30 ​​km.

“Ngingathanda nokugijima i-New York Marathon. Njengabantu bakuleli sinomlando omuhle ngalo mjaho. Uma kungangena igama lami kuleyo ncwadi yomlando ngingajabula kakhulu.”

UFrans unezifiso ezinkulu e-Boston okuhlanganisa nokushaya isikhathi sakhe esingcono kakhulu somjaho  esingu-2:09:24.

“Inhloso yami enkulu ukuba ngishaye u-2:08:10 ozongiqinisekisa ngethikithi lokuya kuma-Olympics azoba se-France ngo-2024.

Ngijabulele ukuthi ngizobe ngigijima uma ngingawina kungaba ibhonasi kumina.

Osesithombeni esingenhla: uMelikhaya Frans

Umthombo wesithombe: Sithunyelwe

Izihloko zakamuva