Celani Sikhakhane
Abaculi baKwaZulu-Natali abebebhekane nesikhathi esinzima ngobubhane basamukele isinqumo sokumemezela ukubuya kwe-Durban July.
UNdunankulu waKwaZulu-Natali, uMnu Sihle Zikalala, umemezele ngoMgqibelo ukuthi lo mjaho wamahhashi oyingqophamlando uzobuya kulo nyaka ngemuva kokuhoxiswa iminyaka emibili ilandelana ngenxa ye-Covid-19.
Lokhu kuhoxiswa kulandelana kube yinhlekelele kubasiki bengqephu abaningi bakulesi sifundazwe, abanye babo okuphoqeleke ukuthi bavale amabhizinisi abo badayise nemishini yokuthunga ngenxa yokushoda kwemali.
UMumsy Mkhwanazi welebuli yemfashini i-Afrolicious utshele i-Scrolla.Africa ukuthi kudingeke ukuthi badilize abasebenzi babo abaningi ngoba umthombo wabo omkhulu wemali bekuyi-Durban July.
“Kudingeke ukuthi sidilize abantu abaningi okuhlanganisa abenza i-make-up, abathwebuli bezithombe nabanye obekumele badayise imishini yokuthunga. Njengabasiki bengqephu ibhizinisi lethu lithembele emicimbini efana ne-Durban July.”
Ngo-2020 nango-2021, kwaba nemibukiso yaku-intanethi eyenziwa esikhundleni somcimbi obukhoma, kodwa uMkhwanazi uthi le micimbi yenza okuncane ukuvala ukudayiswa kwamathikithi okulahlekile.
“Ngemuva kokuthi wenziwe ku-inthanethi, sahlukumezeka ngoba awukho umcimbi okwazile ukuba bukhoma lapho izihambeli ezifika khona zigqoke imikhiqizo yethu,” kusho uMkhwanazi.
“Ukuzwa izindaba ezimnandi kangaka ngeSonto kuyimpumelelo enkulu,” kusho uMkhwanazi.
USthandiwe Hlongwana we-Bright Shadow uchaze lezi zindaba “njengesimemezelo esihle kakhulu esake saba khona.
“Sijabule kakhulu ngokuthi sibuyela ebhizinisini. Nge-Durban July, siqala ukwenza imali kusasele inyanga ngaphambi komcimbi omkhulu lapho onobuhle bekhombisa imikhiqizo yethu emicimbini eyahlukene eba ngaphambi komcimbi omkhulu,” esho.
Uqhube wathi eminyakeni emibili edlule inkampani yakhe ibiphila ngokuqashisa ngezimpahla zokugqoka.
I-Durban July izoba ngomhlaka-2 kuNtulikazi kulo nyaka e-Greyville Racecourse.
Inkundla yomjaho eyingqophamlando yeDolobha ibiyikhaya le-Durban July phakathi neziMpi Zomhlaba ezimbili nomcimbi wezemidlalo wamazwe ngamazwe owaqala kusukela ngomhlaka-17 kuNtulikazi ngo-1897, lapho ihhashi uCampanajo leqa khona umugqa kuqala kumjaho webanga elingamakhilomitha ngaleso sikhathi.
.
