Lubhalwe nguMichael Madyira
IPolokwane City ikhushulelwe ku-Premier Soccer League ngemuva kokuqokwa njengompetha be-National First Division ngosuku lokugcina lomkhankaso ngeSonto.
Kube ukuphela okumangalisayo kombango wokukhushulelwa phezulu njengoba amaqembu amathathu engene emzuliswaneni wokugcina wemidlalo namathuba okuthola ithikithi lokungena kwi-PSL.
IRise and Shine ishaye iPretoria Callies ngamagoli amane eqandeni enkundleni yase-Old Peter Mokaba ukuzitholela isicoco seligi ngemuva kwamasizini amathathu esigabeni sesibili.
Ingene osukwini lokugcina lwesizini kuNFD ilandela iCape Town Spurs eqhwakele ngamaphuzu amabili neCasric Stars ebihamba phambili.
Kodwa ngenxa yokuthi iSpurs idlale ngokulingana (1-1) ekhaya neNyuvesi yasePitoli kwathi iCasric yabambana ngezihluthu (2-2) ne-All Stars FC, iPolokwane City yagxumela esicongweni.
Baqede umkhankaso wabo bebambene ngamaphuzu angu-57 neSpurs kaShaun Bartlett, kodwa ukuhlukana kwabo kwamagoli kubathumele ku-PSL.
Iqembu likaBartlett kanye ne-Casric bazoba nethuba lokugcina lokudlala ibhola elisezingeni eliphezulu uma sebebambe iqhaza kuma-play-offs okukhuphukela esigabeni sokuhlungela iqembu eliqede endaweni ka-15 ku-PSL.
IPolokwane igawulwe yizembe ekupheleni kwesizini ka-2019/20 yacishe yehliselwa ku-NFD ngesigaba esilandelayo.
Okwenze kwabangcono kumkhankaso wabo ngesizini edlule ukuthi baqede endaweni yesithupha futhi babhekana nenselelo enkulu yethikithi le-PSL abalitholile.
Njengamanje ngaphansi komqeqeshi uDuncan Lechesa, owayengumdlali wasesiswini weFree State Stars, iPolokwane City inabadlali abanamava abafana noMpho Makola owayexhumene ne-Orlando Pirates noLucky Baloyi futhi owayeyisihlabani seKaizer Chiefs.
Isithombe esingenhla: Abadlali bePolokwane City bebungaza