Lubhalwe nguMichael Madyira
Ukunqoba kwe-Morocco ngamagoli amabili kwelilodwa behlula ompetha bomhlaba i-Brazil esewine amahlandla amathathu ngoMgqibelo kungase kube nomthelela emdlalweni weBafana Bafana wokuhlungela i-Africa Cup of Nations ka-2023 ne-Liberia ngoLwesibili.
IBafana ibhekise amabombo e-Liberia ngeSonto emdlalweni okudinga kakhulu ukuthi bawunqobe futhi igweme ukubhekana ne-Morocco njengoba benengcindezi yokuqoqa amaphuzu amathathu ngoNhlangulana.
Elakuleli lizokwamukela i-Atlas Lions emdlalweni wokugcina ka-Group K ngoNhlangulana mhlaka-12.
Kodwa ukuze baye kulo mdlalo bengenazo izinkinga iqembu likaHugo Broos kuzofanele lishaye i-Liberia ngoLwesibili ukuze lizibekisele indawo kowamanqamu we-Afcon liphinde lijabhise i-Morocco.
Ukuhlulwa e-Monrovia kuzokhipha iBafana embangweni wokuhlungela i-Afcon kanti ukudlala ngokulingana kuzoyishiya ibhekene nomsebenzi onzima wokuhlula i-Morocco.
Lokho kwenza umdlalo wangoLwesibili ozodlalelwa enkundleni yase-Samuel Kanyon Doe Sports ube mkhulu kakhulu.
Ngokushaya i-Brazil ekhaya, i-Morocco ikhombisa iBafana okumele ikulindele ngoNhlangulana.
UBroos nabadlali bakhe kumele bathathe umphumela wangoMgqibelo njengomyalezo oqinile abawudingayo ukuze banqobe ngoLwesibili.
Njengoba isanda kuphuma emkhankasweni oyingqopha-mlando weNdebe Yomhlaba ye-FIFA ka-2022 njengeqembu lokuqala lase-Afrika ukufinyelela kowandulela owamanqamu, i-Morocco isikhombise ukuzimisela kwayo ngokushaya i-Brazil okokuqala ngqa.
Sebeziveze njengeqembu elikwaziyo ukuzimisela umhlaba wonke futhi umqeqeshi we-Brazil uRamon Menezes uvumile ukuthi badlale neqembu elikhulu kakhulu.
Leli iqembu iBafana Bafana okungamele ifise ukuhlangana nalo emdlalweni okumele bawunqobe.
Ukunqoba kwe-Morocco ihlula i-Brazil kwenzeke ngemuva kosuku elakuleli likhale ngaphansi ngamagoli amabili eqandeni okuvumele i-Liberia esezingeni eliphansi ukuthi idlale nabo ngokulingana (2-2).
Umdlalo phakathi kweBafana ne-Atlas Lions wadlalwa ngoNhlangulana odlule ngesikhathi iqembu laseNyakatho ne-Afrika linqoba ngamagoli amabili eqandeni ngemuva kokuthi lihambe phambili ngegoli likaLyle Foster.
Iqembu leBafana Bafana liphinde lenza iphutha elifanayo libhekene ne-Liberia ngoLwesihlanu.
Isithombe esingenhla: I-Morocco ibhekene ne-Brazil
Umthombo wesithombe: I-Royal Moroccan Football Federation