Lubhalwe nguThathe Msimango
Abasubathi besifazane bakuleli bajabule njengoba i-Spar 10km Women’s Grand Prix inyusa izinga ngemiklomelo emikhulu kozowina imidlalo yonke.
Njengoba izobe igubha iminyaka engu-30 yasungulwa, imidlalo ye-Grand Prix izobanjelwa eKapa, eThekwini, eGoli, e-Gqeberha, eMbombela nasePitoli. Lo mjaho uheha abagijimi besifazane abavela kuwo wonke amazwe ase-Afrika.
Umlenze wokuqala uzoba seKapa ngempelasonto.
Abagqugquzeli bamemezele ukuthi odle umhlanganiso uzogoduka nesamba sika-R200,000 bakhuphuke ngo-R10 000 emalini yomklomelo wangonyaka odlule.
Kunomklomelo owengeziwe ka-R75,000 obekelwe umsubathi wakuleli ozoba namaphuzu aphezulu.
Abagijimi abaphezulu kuka-25 bazothola amaphuzu emjahweni ngamunye, owinile wokugcina kuzobe kuhlanganiswe amaphuzu wonke.
UKesa Molotsane, owine i-Grand Prix ka-2017 futhi omele umqhudelwano we-World Athletics Cross Country Championship e-Bathurst, e-Australia uzamukele lezi zindaba.
“Lezi yizindaba ezimnandi, iningi labagijimi ligijima ngokomsebenzi futhi kumele londle imindeni yalo.”
Uthe le mali eyengeziwe izogqugquzela abagijimi ukuthi bathuthuke njengoba lo mjaho ungomunye wembalwa kuleli ogijinywa ngabesifazane kuphela.
UGlenrose Xaba, odle umhlanganiso ngo-2018 ukholwa ukuthi lo mjaho usize abasubathi ukuthi bazimisele ngokugijima ngesivinini.
Ujabulile ngokunyuka kwemali yemiklomelo.
“Ukubona imali eningi kwenza umqhudelwano ushube kakhulu.”
Osesithombeni esingenhla: UKesa Molotsane
Umthombo wesithombe: I-Twitter