Dylan Bettencourt
Ngokokuqala ngqa emlandweni weNdebe yoMhlaba ye-Federation Internationale de Football Association (Fifa) ukuthi kube nonompempe besifazane abazodlalisa ngemuva kokuqashwa okuzoba inqophamlando okuhlanganisa noSalima Mukansanga wase-Rwanda.
NgoLwesine i-Fifa iqoke onompempe besifazane abathathu nabasizi abathathu ukuthi baphathe imidlalo yeNdebe yoMhlaba e-Qatar.
Kuqokwe onompempe abangu-36, abasizi bonompempe abangu-69 kanye nabaphathi bemidlalo yamavidiyo abangama-24 kulo mqhudelwano okuhlanganisa nonompempe waseNingizimu Afrika uVictor Gomes.
Ukuqokwa kwabaphathi bemidlalo besifazane abayisithupha kusho ukuphela kweminyaka engu-92 yokulinda owesifazane ozophatha imidlalo yeNdebe yoMhlaba yabesilisa.
Onompempe besifazane abakhethiwe nguStephanie Frappart wase-France, uMukansanga wase-Rwanda noYoshimi Yamashita wase-Japan.
Abasizi bonompempe besifazane nguNeuza Back wase-Brazil, uKaren Diaz Medina wase-Mexico noKathryn Nesbitt waseMelika.
Onompempe besifazane abanaso isiqiniseko sokuthi banethuba lokuphatha umdlalo.
USihlalo wekomidi lonompempe be-Fifa uPierluigi Collina uthe ukuqokwa kwabo sekuneminyaka kwaqalwa ukukhulunywa.
“Lokhu kuphetha uhlelo olude olwaqala eminyakeni eminingi edlule ngokujutshwa konompempe besifazane emiqhudelwaneni ye-Fifa yabesilisa abancane nabadala.
Ngale ndlela sigcizelela ngokusobala ukuthi le ikhwalithi ebalulekile kithi hhayi ubulili,” kusho uCollina.
Usihlalo wengeze ngokuthi amathemba e-Fifa ukuthi ukuqokwa konompempe besifazane emiqhudelwaneni yebhola lezinyawo yabesilisa kube into ejwayelekile.
“Kubafanele ukuba seNdebeni yoMhlaba ye-Fifa ngoba bahlale besezingeni eliphezulu futhi lokho into ebalulekile kuthina,” kusho uCollina.
Onompempe besifazane sebegqame kakhulu kulo mdlalo njengoba unompempe wase-Rwanda uMukansanga ophathe imiqhudelwano ye-Africa Cup of Nations (i-Afcon) okuyingqophamlando.
UFrappart noKateryna Mozul babe izikhulu zomdlalo wokuqala kweyokuhlungela iNdebe yoMhlaba yabesilisa ngonyaka odlule.
Phakathi konompempe base-Afrika abazoya e-Qatar kukhona uJanny Sikazwe wase-Zambia owashaya impempe kabili ngaphambi kokuphela kwemizuzu engu-90 emdlalweni we-Afcon ngoMasingana.
Umthombo wesithombe: @ESPNFC