Lubhalwe nguLinda Ximba
Umqeqeshi wesibhakela osewine izindondo eziningi uColin “Nomakanjani” Nathan nompetha womhlaba uSivenathi “Special One” Nontshinga baqokwe emcimbini wezindondo we-Boxing Writers Association of America (BWAA).
Akubona nje kuphela laba bobabili umqeqeshi nomshayisibhakela bokuqala bakuleli ukuqokwa yile nhlangano ehlonishwayo, kodwa bangabokuqala base-Afrika.
I-BWAA yasungulwa ngo-1926.
UNathan owine i-SA Boxing Trainer of the Year ka-2017 kanye no-2018 uqokwe kwi-Eddie Futch Trainer of the Year gong kanti uzoqhudelana noBill Haney, uDerrick James, uGennady Mashyanov noBob Santos.
Umeluleki waseMelika ongasekho owayehlonishwa kakhulu uFutch waqeqesha abafana no-Joe “Smokin Joe” Frazier, uLarry Holmes no-Ridick “Big Daddy” Bowe ukuba babe ompetha bomhlaba.
Emisebenzini ethathe iminyaka eyishumi uNathan owayengumethuli wezinhlelo zakumabonakude usekhiqize ompetha bomhlaba abayisikhombisa abasemthethweni.
Phakathi kwabadlali abahamba phambili abazophuma ezandleni zakhe kukhona uHekkie Budler onqobe izicoco zomhlaba eziyisithupha ezigabeni ezimbili ze-weight divisions.
Phakathi kwamabhande awawinile kubalwa ele-World Boxing Association (WBA) nele-International Boxing Federation (IBF) junior-flyweight kanyekanye ehlula uRyoichi Taguchi kwelakubo e-Japan ngo-2018.
UNathan ungene ku-Twitter exoxa ngezindaba ezimnandi wathi: ngizizwa nginokuthobeka nenjabulo ukuthi i-@PunchPerfectBox ingenze umqeqeshi wabo wonyaka we-International Boxing.”
Mayelana noNontshinga, impi ye-IBF junior flyweight nompetha wase-Mexico uHector Flores ngasekuqaleni kukaMandulo imenze waqokwa eqoqweni lika-Muhammad Ali-Joe Frazier Fight of the Year.
UNontshinga oneminyaka engu-23 ubudala wase-East London ube umshayisibhakela wokuqala ukwehlula uFlores ngesikhathi enqoba umdlalo wabo e-Mexico. Lokhu kumenza abe nguye yedwa owakuleli njengamanje obizwa ngompetha womhlaba wesibhakela osemthethweni.
Abanye abaqokelwe umklomelo we-Fight of the Year:
Owine kumzuliswano weshumi uJermell Charlo ehlula uBrian Castano, uSebastian Fondura onqobe umzuliswano wesishiyagalolunye ehlula u-Erickson Lubin, onqobe umzuliswano ka-11 uJoe Joyce ehlula uJoe Parker, uJai Opetaia ohlule uMairis Briedis noLeigh Wood owanqoba kumzuliswano ka-12 ehlula uMichael Conlan.
Abawinile kuhlelwe ukuthi bamenyezelwe mhla ziyishumi kuMasingana.
Osesithombeni esingenhla: nguCollin Nathan kanye noSivenathi Nontshinga
Umthombo Wesithombe: Sithuyelwe