Menzi Magubane
INingizimu Afrika kufanele iziqhenye!
Ngokokuqala ngqa, ukuth abaqeqeshi ababili baseNingizimu Afrika baqokwe emklomelweni we-International Federation of Football History & Statistics (i-IFFHS) Manager of the Year ama-Award onyaka wezi-2021.
Umqeqeshi we-Al Ahly, uPitso Mosimane, noManqoba Mngqithi ongumqeqeshi weMamelodi Sundowns, basohlwini lwabaqeqeshi abangama-24 okuzokhethwa kubona ozowina kulo mklomelo ohlonishwayo.
Laba bobabili abake baba ozakwabo kwiSundowns kumele nabo bazizwe bekhethekile. Phela babalwa kuligi eyodwa noPep Guardiola we-Manchester City, uThomas Tuchel we-Chelsea noZinedine Zidane oke wayibamba kwi-real Madrid.
Ukubona amagama kaMosimane noMngqithi ohlwini olulodwa kungenza ngiziqhenye ngokuba ngumuntu waseNingizimu Afrika.
UMosimane uyena yedwa umqeqeshi waseNingizimu Afrika osewine indebe ye-CAF Champions League – futhi usekwenze lokho izikhathi ezintathu. Ukuhlonishwa kwakhe okuholele ekutheni aqokwe kwi-IFFHS kufike ngesikhathi enqoba i-Championship League ne-CAF Super Cup amasizini amabili elandelana ne-Al Ahly.
Lo mqeqeshi oneminyaka engama-57 ubudala uphinde waholela ama-Red Devils endaweni yesithathu kwindebe yomhlaba ye-FIFA ngesizini edlule.
UMngqithi uthathe izintambo kuSundowns ngesikhathi uMosimane eshiya ngoMandulo ngonyaka wezi-2020. Ngesizini yakhe yokuqala uMngqithi unqobe isicoco se-DSTv Premiership, nokube yingqophamlando kuleli qembu ngoba beliphakamisa indebe yeshumi.
Abanye abaqeqeshi abaphambili ohlwini kubalwa uMauricio Pochettino we-PSG, u-Unai Emery wase-wase-Vilarreal no-Ole Gunnar Solskjaer we-Manchester United.
Kukhona noHans Flick, obeqeqesha i-Bayern Munich ngesizini edlule futhi manje oseqenjini lesizwe lase-German; uJulian Nagelsmann, obeqeqesha i-RB Leipzig ngesizini edlule manje useqeqesha i-Bayern, uDiego Simeone we-Atletico Madrid kanye no-Antonio Conte owayekade eqeqesha i-Inter Milan.
Abanye: UChristophe Galtier (Lille), uYuriy Vernydub (Sheriff), uRenato Gaúcho (Flamengo), u-Abel Ferreira (Palmeiras), u-Alexi Stival “Cuca” (Atletico Mineiro), uMoeni Chaabani (Esp Tunis), uJim Curtin (Philadelphia Union), uSantiago Solari (CF America), uJavier Aguirre (CF Monterrey), uJuan Reynoso (Cruz Azul), uLeonardo Jardim (Al Hilal FC) kanye noGi dong Kim (Pohang Steelers).
Umthombo wesithombe: @MamelodiSundowns