Everson Luhanga
Amakhulu abalandeli baphume ngothi lwabo bezoseka uNhlanhla Lux Dlamini ongumholi we-Operation Dudula elwisana nabaphuma emazweni angaphandle eNkantolo yeMantshi yase-Roodepoort ngoMsombuluko ekuseni.
ULux udedelwe ngebheyili kaR1500 ngecala lokushaya. Kube nenhlokomo ngesikhathi ededelwa, abalandeli bakhe bamamukela njenge qhawe.
Ngesikhathi abalandeli baLux becula izingoma bedansa ekuseni, bebephethe ibhokisi elinobuso bomholi we-Economic Freedom Fighters (i-EFF) uJulius Malema. Ibhokisi belibhalwe ukuthi “R.I.P Juju”.
Lenhlangani ithi i-EFF iyona eyimbangela yokuthi umholi wayo uLux avalelwe ejele ngempelasonto.
Bekunamaphoyisa amaningi nezinyala nabantu abaningi eduze kwenkantolo.
UVincent Ndima, uMengameli wePhalamende lase-Alexandra ofikile ukuzokweseka uzakwabo, uthe i-Operation Dudula izoqhubeka nokusebenzisana nabalandeli bayo ngaphakathi kwemingcele yomthetho.
“Umthetho usilawula sonke, futhi ngeke sidale isiphithiphithi,” usho kanje.
Uthe ukuboshwa kukaNhlanhla Lux kubangelwe yipolitiki ye-EFF.
“Ibhokisi lisho ukushona kwe-EFF nomholi wayo uJulius ‘Juju’ Malema.”
Abalandeli beqembu lepolitiki i-Patriotic Alliance nabanye abaholi bezinhlangano zase-Soweto njenge-Soweto Tourism bebeseka uLux.
La balandeli basale ngemuva kwezinsimbi ebangeni eliyikhilomitha ukusuka ebhilidini lenkantolo kanti abaholi abaqavile balo mbutho baye bavunyelwa ukusondela eduze.
Abalandeli balindele ukukhululwa kukaLux ukuze akhulume nabo.
.
