Lubhalwe nguRorisang Modiba
Inqola ehamba ngegesi ishayise yaqhuma eduze kwase-Abuja, kwashona abantu abayisishiyagalombili, kwasha izimoto ezingu-14.
Izingozi zamaloli zivamile e-Nigeria ngenxa yokungahambi kahle kwezitimela, okunemiphumela ebulalayo efana nokuqhuma kwenqola okwabulala abangu-98 ngoMasingana.
Kushone abantu abayisishiyagalombili ngesikhathi inqola ebithwele usimende ihluleka ukulawuleka yashayisa izimoto eziningi ngesikhathi kunesiminyaminya ngasenkabeni yedolobha lase-Nigeria, i-Abuja.
Le ngozi yenzeke eduze kwebhuloho i-Nyanya e-Ayo, ebangeni elingamakhilomitha ayishumi ukusuka enkabeni yedolobha, yadala umlilo omkhulu oshise izimoto ezingu-14.
Ngokusho kwe-Federal Capital Territory Police Command, inqola ibisebenza ngegesi (CNG) ishayise isiminyaminya sezimoto.
“Umthelela ubangele umlilo omkhulu, washisa izimoto ezingu-14,” kusho uMnyango Wezokuphathwa Kwezimo Eziphuthumayo wedolobha. Abantu bagijima bethukile njengoba umlilo ububhebhetheka ngokushesha.
Abantu abayisithupha bakhishwe kule ngozi baphuthunyiswa esibhedlela kodwa bashona ngenxa yokulimala.
Izingozi zamaloli ezinjengalezi zivamile emigwaqeni emikhulu yase-Nigeria. Esinye sezizathu eziyinhloko uhlelo lwezwe olubi lwezitimela, oluphoqa izimpahla ukuba zihanjiswe emigwaqeni.
NgoMasingana, kwenzeka inhlekelele efanayo eSifundazweni Sase-Niger. Kwashona abantu abangu-98 ngemuva kokuzama ukudonsa uphethiloli enqoleni eyashayisa.
Uphethiloli wathungeleka ngesikhathi othile esebenzisa ijeneretha eduzane, nokwadala ukuqhuma okwabulala abantu abaningi.
Esithombeni esingenhla: Indawo yesigameko
Umthombo wesithombe:@oMah of arsenal