Amazwe amaningana emhlabeni jikelele okuhlanganisa iMelika ne-UK abeke imikhawulo yokuhambela e-China ngemuva kokuqubuka kabusha kwe-Covid-19 kuleliyazwe.
Ukutheleleka kuleliyazwe kuye kwabhebhetheka kakhulu ngoZibandlela ngemuva kokuthi uhulumeni ehlise imikhawulo yakhe eqinile.
Iziphathimandla zivumile ukuthi lokhu kuqubuka “kunzima ukulandelwa.” Uhulumeni wase-China umemezele ngesonto eledlule ukuthi uzoyeka ukuqopha isibalo sabantu ababulawa i-Covid-19. Khonamanjalo, i-National Health Commission yase-Beijing ithe ngoMgqibelo ngeke isashicilela izibalo zabathelelekile nsuku zonke.
Amanye amazwe abeke imithetho eyisibopho okuhlanganisa nokuhlolelwa i-Covid-19 kubantu abavela e-China.
Kusukela mhla zinhlanu kuMasingana kulo nyaka amazwe ambalwa okubalwa kuwo iMelika, i-Australia, i-Canada, i-UK ne-European Union azosebenzisa umthetho omusha oyimpoqo wokuhlolela i-Covid-19 kubantu abavela e-China.
Kodwa-ke, kuze kube manje elakuleli likhethe ukungabeki imikhawulo kubantu abavela e-China.
“Asikho isidingo sokuthi umphakathi wethuke,” kusho okhulumela uMnyango wezeMpilo uFoster Mohale, kubika i-EWN.
Imithetho yokuvakasha emisha ehlobene ne-Covid-19 esetshenziswa amazwe idinga ukuthi bonke abantu abavela e-China baveze umphumela wokuhlolelwa i-Covid-19 oshoyo ukuthi abathelelekile othathwe zingakapheli izinsuku ezimbili ngaphambi kohambo lwabo.
I-Japan ibengelinye lamazwe okuqala ukubeka imithetho emisha kwabavela e-China ngokuthi umuntu aveze umphumela wokuhlolelwa i-Covid-19 oshoyo ukuthi akathelelekile.
Imithetho ifaka phakathi labo abasuka e-Hong Kong nase-Macau.
Luhlanganiswe nguMashudu Mabila
Esithombeni esingenhla: Odokotela bahlola izihambi
Umthombo Wesithombe: The Citizen