Lubhalwe nguDoreen Mokgolo
Umndeni kaBayanda Walaza uyaziqhenya ngempumelelo yakhe, ukholelwa ukuthi ukusebenza kanzima nokuzinikela kwakhe kumsize wafeza iphupho lakhe lokuwina indondo yama-Olympics eneminyaka engu-18 nje kuphela.
UBayanda, ofunda umatikuletsheni eCurro Academy ePitoli, ubeyingxenye yethimba leTeam South Africa eligijima i-4x100m relay, elihlanganisa uShauma Maswanganyi, uBradley Nkoana, no-Akani Simbine.
Bawine indondo yesiliva ku-4x100m relay kuma-Olympic Games ka-2024 e-Paris.
Umalume kaBayanda ozigqajayo, uKgotso Makinta, utshele i-Scrolla.Africa ukuthi ukubona uBayanda eqhudelana nabagijimi abanamava kukhombisa ukuthi konke ukuzidela bekufanelekile.
“Ngesikhathi uBayanda enza uGrade 6, waliphinda leli banga ukuze athuthukise amamaki akhe wathola noxhaso lomfundaze wakwaMurray & Roberts ukuze afunde eVorentoe High School. Lesi sikole besinezinsiza zemidlalo ezingcono futhi sikhiqize abagijimi abahamba phambili kuleli. Usebenze kanzima, inkampani yamxhasa waze wayofunda uGrade 11,” kusho uMakinta.
Leli thuba lisize osemusha waseKatlehong Ekurhuleni, njengoba ethole umqeqeshi oqeqeshekile owathuthukisa ithalente lakhe wamenza umsubathi asenguye namuhla.
Kodwa-ke, ngo-2023, umndeni wathola ukuthi inkampani ayisakwazi ukuxhasa izifundo zakhe ngenxa yezinkinga zezimali.
“Ngaleso sikhathi wayesanda kunqoba i-200m ngaphansi kweminyaka engu-18 ku-Athletics South Africa Championships. Saxhumana nomqeqeshi uHennie Kriel, owaxhumana neCurro Academy ePitoli, bamnikeza umfundaze. Efunda umatikuletsheni, uthole umfundaze ogcwele eRuta Sechaba Foundation,” kuchaza uMakinta.
Lapho uBayanda efanelekela ukungenela umncintiswano e-Paris, umndeni ubukhathazekile ngamamaki akhe esikoleni.
“Usiqinisekisile ukuthi uzohamba nawo umsebenzi wakhe wesikole eya kuma-Olympics aqhubeke nezifundo zakhe, isikole siphinde samthembisa ukuthi sizomthumela umsebenzi ngesikhathi somqhudelwano,” kusho uMakinta.
Ithimba laseNingizimu Afrika litheleke e-OR Tambo International Airport ngoLwesibili ekuseni, labuya nezindondo eziyisithupha: eyegolide eyodwa, ezesiliva ezintathu, nezethusi ezimbili.
Osesithombeni esingenhla: UBayanda Walaza.
Umthombo: X