Everson Luhanga
Empilweni yakhe, uSipho Ameni usaboshwe amahlandla ayi-15 – kodwa akakaze atholwe enecala.
USipho, manje oneminyaka engama-38 ubudala, uthe amaphoyisa endawo ahlala emhlukumeza azi kahle kamhlophe ukuthi umsulwa.
Waboshwa okokuqala ngowezi-2003 ngamacala abucayi kakhulu okuphanga kuhlonyiwe nokubulala. USipho wayengazi ukuthi lolu sizi olubuhlungu luzophindaphindwa eminyakeni eyi-18 elandelayo yempilo yakhe njengephupho elibuhlungu eliphindaphindayo:
● Waboshelwa ukushaya ngowezi-2005 nangowezi-2006
● Ngowezi-2012, amaphoyisa ambopha ngecala lodlame lwasekhaya
● Ngowezi-2013, waphinde waboshelwa icala lokushaya
● Ngowezi-2018, waboshelwa ukugqekeza
USipho utshele i-Scrolla.Africa esemzini wakhe e-Alexandra ukuthi kusukela ngomhla zingama-28 kuZibandlela ngonyaka owedlule useboshwe amahlandla ayisishiyagalolunye!
Ukholelwa ekutheni umamncane wakhe uzama ukumxosha futhi wenze izinsolo ezingamanga ngaye emaphoyiseni.
Uthe umamncane wakhe ufuna yena nomama wakhe okhubazekile owashaywa yisifo sohlangothi, baphume emagcekeni.
“Ufuna siphume endlini enamagumbi amabili engeyakhe egcekeni,” esho.
Umamncane kaSipho, uSuzen Ameni, utshele i-Scrolla.Africa ukuthi usazoboshwa uSipho ngokuxhumana naye esebenzisa intatheli.
USipho uthe izithiyo zokuvimbela akuyona into entsha. Noma nini uma umamncane ethukuthela umsongela ngomunye futhi umyalo.
USipho uthe uboshwe ngamaphoyisa amabili afanayo avela esiteshini samaphoyisa sase-Alexandra.
“Njalo ekupheleni kwenyanga ngiyaboshwa. Uma kungelona iphoyisa lesilisa, kuza iphoyisa lesifazane lingibophe. Bangisola ngokushaya okuyinto engingayenzanga,” esho.
Uthe usebenzise imali eningi ephuma ejele ngebheyili futhi usokole impilo yakhe yonke ngamathuba amancane omisebenzi.
Imali engenayo kaSipho ivela ekuqashiseni elinye lamagumbi akhe kube isitolo sesipaza.
“Le mali ingisiza ukunakekela umndeni wami nomama”.
Okhulumela amaphoyisa ase-Alexandra uSayitsheni Simphiwe Mbatha ukuqinisekisile ukuthi lo mlisa uboshwe amahlandla amaningi yi-SAPS. UMbatha uthe amanye amacala ahoxiswa ngummangali ngenkathi amanye esulwa enkantolo ngenxa yokushoda kobufakazi.