Lubhalwe nguMichael Madyira
Amakhosi ekugcineni asededele ngemininingwane ngomunye wemidlalo yawo yobungani eyandulela isizini e-Turkey.
Iqembu liye e-Istanbul ngomhlaka-4 kuNtulikazi kwikhempu yokuqeqeshwa amasonto amathathu ukuze ilungiselele isizini ka-2024-25.
Uhlelo belugcinwe luyimfihlo, kodwa bakhiphe isitatimende mayelana nomdlalo ozayo.
“Njengoba iqembu liqhubeka nekhempu yangaphambi kwesizini namalungiselelo e-Turkey, Amakhosi azodlala umdlalo wawo wesithathu wokuzilolonga/wobungani ne-Al Shahaniya SC yase-Qatar e-Istanbul ngoMgqibelo ngomhlaka-20 kuNtulikazi,” kusho lezi zinkunzi zaseSoweto.
I-Al Shahaniya isanda kukhushulelwa ku-Qatar Stars League.
Ngokungafani nezimbangi zayo, i-Orlando Pirates neMamelodi Sundowns abaphumele obala ngemidlalo yabo yokulungiselela ukuqala kwesizini, iKaizer Chiefs ibiqikelele kakhulu futhi ingavumeli ngisho ukusakazwa bukhoma kwemidlalo yayo.
Le khempu yaphesheya ingeyokuqala kusukela ngo-2003, ngesikhathi beya e-South Korea.
Ikhempu yase-Turkey ibe nezingqinamba njengoba abadlali basemuva u-Edmilson Dove noBongani Sam bebuyiselwe ekhaya ngenxa yokulimala kanzima.
Unozinti uFiacre Ntwari, osayinwe yiwo Amakhosi kuTS Galaxy, akakwazanga ukujoyina ozakwabo abasha ngenxa ye-visa futhi uzoqala ukuzilolonga neqembu uma sebebuyele eNingizimu Afrika.
UDillan Solomons, uTebogo Potsane, uGeorge Matlou, uMduduzi Mdantsane nabo abekho ekhempini ngenxa yezinkinga zokuzivocavoca ngesizini edlule.
Isithombe esingenhla: IKaizer Chiefs izilolonga e-Turkey.
Umthombo: IKaizer Chiefs