Lubhalwe nguZukile Majova
Umhleli Wezepolitiki
Impi phakathi kowayengumengameli we-ANC oxoshiwe uJacob Zuma kanye “ne-ANC kaRamaphosa” isekude ukuphela.
Lokhu kushiwo umakadebona we-ANC, uMnuz Tony Yengeni, obemele uZuma esigcawini sokuqondiswa kwezigwegwe esigcine ngokuthi uZuma axoshwe eqenjini.
UZuma kutholakale ukuthi wephule umthethosisekelo we-ANC ngokusungula uMkhonto weSizwe nokuwukhankasela ngokumelene ne-ANC.
UYengeni uthe uZuma usacwaninga isinqumo seqembu nabameli bakhe futhi uzimisele ukulwa kuze kube sekugcineni.
Kumanje ithimba likaZuma lisola i-ANC ngokuqamba amanga ngesikhathi ithi kube nenguyazana eyandulela ukuqulwa kwecala nomele uZuma.
UYengeni uthe nguyena owacela ingqungquthela eyandulela ukuqulwa kwecala kodwa yangenzeka.
Utshele i-SABC ukuthi ngesikhathi kuqhubeka lolu hlelo, wathola inqwaba yemiyalezo emsabisayo evela kuNobhala Jikelele we-ANC uFikile Mbalula.
“Kunomyalezo kaMbalula engawuthola ngoMgqibelo kusihlwa, ngizihlalele ekhaya. Lo myalezo ubuthi ‘wenzani?’
“Lokhu kungemuva kokuthi ngivele [phambi kwekomiti lokuqondisa izigwegwe] ngoLwesithathu. Umyalezo ubuthi ‘Ucabanga ukuthi ungubani wena. Ufuna ukucekela phansi i-ANC?’
“Ngaphansi kwezimo ezijwayelekile bengizophendula kulowo myalezo ngoba angethuki kalula,” kusho uYengeni.
NgokukaYengeni, uZuma akazange alalelwe ngendlela efanele.
Ikomidi le-ANC eliqondisa izigwegwe linikeze uMsholozi izinsuku ezingu-21 ukuthi adlulisele lolu daba ekomitini lokudlulisa amacala.
Esithombeni ngenhla: UFikile Mbalula usolwa ngokusabisa omele uZuma.
Umthombo: X