Lubhalwe nguZukile Majova no-Everson Luhanga
Iyasichitha isiteleka esihlelwe uJulius Malema imboni yamatekisi.
I-SA National Taxi Council isikuqinisekisile ukuthi angeke izibandakanye nombhikisho we-EFF kazwelonke ophikisana nokucinywa kukagesi kanye nohulumeni kaMengameli Cyril Ramaphosa.
Imboni yamatekisi ithutha abagibeli cishe abangu-15 million ngosuku. Ukungasebenzi ngokuphelele kuzodla imboni yamatekisi imali engu-R60 billion ngaphezu kuka-R150 million ngosuku.
NgoLwesithathu ebusuku i-Santaco ithe ukuhlangana kwayo nobuholi be-EFF akusho ukuthi bayaweseka umbhikisho.
Phambilini i-Santaco iye yanqaba ukuthatha uhlangothi kwezombusazwe zakuleli.
Ukwenqaba kwe-Santaco izinhlelo ze-EFF kuzobonakala njengokulimaza kakhulu ukuvalwa kwezwe futhi ababhikishi ngeke bakwazi ukuvala imigwaqo emikhulu ngomhlaka-20 kuNdasa.
Umholi we-EFF uJulius Malema uthe bayazi ukuthi imboni yamatekisi ayiyazi ipolitiki futhi bebengalindele ukuthi ingenele umbhikisho.
Uthe bebefuna ukuhlangana nobuholi obuphezulu be-Santaco ngoba bengafuni kubekhona ukungqubuzana. Umholi we-EFF uthe abafune lutho ku-Santaco.
“Kuzoba nomhlangano ngenhloso yokubazisa ukuthi kuzoba nababhikishi emigwaqeni futhi amatekisi kufanele akucabangele lokho.”
Inkulumo iqhubeke yathi: “Akumele kube nokuhilizisana okungenasidingo phakathi kwethu nabamatekisi ngoba sisonke.”
Izinhlangano zamatekisi eziningi kuleli ezikhulume ne-Scrolla.Africa ziziqhelelanisile nokuvalwa kwezwekwangoMsombuluko.
Okhulumela i-Greater Alberton Taxi Association, u-Emmanuel Maleka uthe usoseshini kanye namalungu awo ngeke babe yingxenye yokuvalwa kwamatekisi.
“Sizozuzani ngemuva kokuvalwa kwezwe? Sisazoba sebumnyameni ngokucishwa kukagesu.”
Omunye usoseshini wase-Mpumalanga nawo unombono ofanayo ukhiphe isitatimende sokuthi ngeke ube yingxenye yombhikisho ngoMsombuluko.
Abashayeli bamatekisi abakhulume ne-Scrolla.Africa bathe imboni ilahlekelwe imali eningi ngesikhathi semithetho yokuvalwa kwezwe kubheduka i-Covid-19 kanti amabhizinisi amaningi aphoqeleka ukuthi avale. Bathi ukuvalwa kwezwe kungenye into ephazamisa umnotho.
“Njengezwe kumele sizibandakanye ezihlokweni eziqhubekayo zomnotho hhayi izinto ezizomisa umnotho,” kusho elinye ilungu le-Alexandra Taxi Association elingathandanga ukudalulwa.