Lubhalwe nguMichael Madyira
IMarumo Gallants iziveze njengeqembu elihamba phambili e-Afrika kule sizini njengoba ibheke emdlalweni eyandulela kowamanqamu e-CAF Confederation Cup.
Bahambe bayofuna abadlali abanamava ohlelweni lokwakha isikwati sabo njengamanje bayiqembu elisatshwayoezweni lonke.
Okuqaphelekayo, ngesikhathi i-Orlando Pirates neMamelodi Sundowns ilahla abanye abadlali babo ehlobo iGallants yabathatha.
I-Scrolla. Africa ibheke abadlali abadedelwe emaqenjini abo.
UTshepo Gumede
Lo mdlali (32), uchithe isizini eyodwa nohhafu kuPirates phakathi kuka-2015 no-2016 ngaphambi kokuthi imkhulule.
ULetsie Koapeng
Lo mgadli weGallants ungomunye wabadlali bakudala bePirates kanti uhlale naleli qembu lase-Soweto iminyaka emibili.
UMahlatse Makudubela
UMakudubela (33) ungomunye wabadlali abadala kuMarumo kanti isizini ka-2016/17 uyichithe eqenjini lePirate.
UMpho Mvelase
UMpho (34) odlala emuva kwesokudla, ungomunye umdlali onamava kuGallants oke wadlalela izinkunzi zase-Soweto kusukela ngo-2015 kuya ku-2016.
UJoseph Malongoane
Ngemuva kokuhlala isizini ka-2013/14 nePirates, lo mdlali oneminyaka engu-35 ubudala ubengekho ezinhlelweni zika-Erick Tinkler kanti ngokuhamba kwesikhathi wahlala nezimbangi zase-Soweto iKaizer Chiefs amasizini amathathu ngaphambi kokuthi afike kuGallants.
URiyaz Nell
UNell (23) nguyena yedwa owayedlalela iPirates oneminyaka engaphansi kuka-30 kubadlali beMarumo.
Uqhamuke ekuthuthukisweni kwePirate kanti ugqame kakhulu eqenjini labo le-reserve, kodwa wakuthola kunzima ukungena eqenjini elikhulu.
ULucky Mohomi
UMohomi uchithe amasizini amane nesigamu kuSundowns ngaphambi kokuya kuSuperSport naseVenda Academy kodwa wajoyina iGallants ekuqaleni kwale sizini.
UKatlego Otladisa
Lo mdlali oneminyaka engu-26 ubudala ukhulele eChloorkop wadlulela kuSundowns wagcina ebolekiwe kwamanye amaqembu e-PSL, kodwa akazange aphumelele eqenjini lokuqala le Sundowns.
U-Abram Ngcobo
UNgcobo uke waba ngunozinti weSundowns, njengo-Otladisa wabolekiswa emaqenjini amaningi waze waqeda iminyaka emihlanu ehleli kuleli qembu.
USibusiso Khumalo
UKhumalo (32) ube neSundows phakathi kuka-2013 no-2019, kodwa wabolekiswa kuMaritzburg United, iBidvest Wits neJomo Cosmos ngaphambi kokuthi agcine kuGallants.
UPule Maraisane
UMaraisane ushiye iSundowns ekupheleni kwesizini edlule ngemuva kwamasizini amabili eChloorkop.
U-Ismael Watenga
Lo nozinti oneminyaka engu-27 ubudala wase-Uganda usengumdlali weSundowns obolekwe kuGallants.
Isithombe esingenhla: Umgadli weMarumo Gallants uLetsie Koapeng
Umthombo wesithombe: IMarumo Gallants