Lubhalwe nguZukile Majova
Umculi osewine izindondo eziningi odume ngokugqoka kahle uPharrell Williams usejoyine ngokusemthethweni umkhiqizo wemfashini wase-France i-Louis Vuitton njengomqondisi wawo wabesilisa.
Iqoqo lakhe lokuqala lizovezwa ngoNhlangulana ngesikhathi sesonto lemfashini yabesilisa e-Paris.
Umculi, umbhali wezingoma ophinde abe i-philanthropist uWilliams owaziwa ngokuthanda kakhulu izindwangu zase-Afrika uthatha isikhundla esingenamuntu ngemuva kokushona kukaVirgil Abloh owayengumqondisi wezobuciko owabulawa umdlavuza ngo-2021.
Owine izindondo ze-Grammy amahlandla angu-13 ulandela ezinyathelweni zabasunguli bale nkampani ikakhulukazi umthungi waseMelika uMarc Jacobs.
UPietro Beccari ongusihlalo ophinde abe umphathi we-Louis Vuitton uthe: “Ngiyajabula ukwamukela uPharrell ekhaya ngemuva kokubambisana kwethu ngo-2004 nango-2008 kwa-Louis Vuitton. Umbono wakhe wokubona ngale kwemfashini ngokungangabazeki uzoholela i-Louis Vuitton esahlukweni esisha nesijabulisa kakhulu.”
UWilliams uhambele imicimbi yemfashini e-Afrika yonkana, muva nje ubesembukisweni obuse-Dakar, e-Senegal awuncome njengomunye wemicimbi yemfashini engcono kakhulu aseke wawubona.
Lo mbukiso wemfashini wethulwa umklami wase-France uVirginie Viard ongumphathi wezobuciko e-Chanel.
Kuleli i-Louis Vuitton idlondlobale kakhulu njengoba igqokwa ngabantu abamnyama besigaba esiphakathi abangaphezu kwezigidi ezine kanti kuthiwa lolu hlobo luthengwa ngemali eshisiwe.
Njengoba kulindelekile, izitolo zangempela ezidayisa i-Louis Vuitton ezitolo ezinkulu zezwe ngezabadla izambane likapondo nabasezingeni eliphakathi e-Sandton City kanye nase-Victoria Wharf eKapa.
Esithombeni esingenhla: UPharrell Williams
Umthombo wesithombe: @LouisVuitton