Menzi Magubane
IKaizer Chiefs kuzofanele ibhekane nezingwazi zase-Tanzania iSimba ngaphandle kukaDumisani Zuma kanye noKhama Billiat.
Ngenxa yokulimala, uBilliat benoZuma bazophuthelwa umdlalo neSimba womlenze wesibili we-quarter final ye-CAF Champions League e-Benjamin Mkapa National Stadium, e-Dar es Salaam ngoMgqibelo ngehora le-3 ntambama.
UZuma uphoqeleke ukuthi asheshe aphume emdlalweni womlenze wokuqala ngoMgqibelo ngemuva kokulimala edolweni ngesikhathi iChiefs izenzela kuSimba.
UBilliat akakabuyi ekulimaleni akuthole emasontweni amathathu edlule ngesikhathi iChiefs ishaya iMamelodi Sundowns emdlalweni we-DStv Premiership.
“Idolo likaZuma libi impela, kubukeka sengathi uzobe engekho,” kusho uGavin Hunt etshela abezindaba ze-Kick Off.
“Siphelelwa abadlali futhi. Ukungabi khona kukaZuma kuyinkinga enkulu futhi noKhama Billiat akadlalanga kakhulu kule sizini njengoba eyisongo lethu elikhulu ekuhlaseleni kwethu.”
UHunt, nokho unokuthile okumjabulisayo: unozinti onamava u-Itumeleng Khune ubuyile ekumisweni kwakhe futhi uzobe eyingxenye yomdlalo.
Ngempelasonto edlule, uBruce Bvuma ube nosuku oluhle kakhulu enkundleni njengoba ekwazile ukugcina ishidi elihlanzekile emdlalweni wakhe wokuqala we-Champions League, kodwa amava kaKhune azosisiza kakhulu e-Tanzania.
Amakhosi asizakale ngamagoli amane ewatholile futhi inqobo nje uma iSimba ingawalinganisanga lawo maphuzu, Amakhosi azoba nendawo kwi-semi final.
Kumanje banikezwe isheke lezigidi ezingu-R9.5 lokudlulela kuma-quarter final.
Uma kwenzeka benqoba futhi bedlulela kwabane bokugcina, baqinisekiswe ukuthola izigidi ezingu-R12.4.
Umthombo wesithombe: @KaizerChiefs