Razeen Gutta
Ukuhamba kwabadlali abaseqopheleni eliphambili e-Afrika kuleli sonto njengoba kuzoqala i-Afcon ngomhlaka-9 kuMasingana kungase kuyithuthukise kakhulu i-Manchester City.
Njengoba leli qembu lilahlakelwe nguRiyaad Mahrez wase-Algeria, nezimbangi zabo i-Liverpool zizobe zingenaye umpetha wabo uNaby Keita wase-Papua New Guinea kanye nezithenjwa zabo ezimbili uMohamed Salah wase-Egypt kanye noSadio Mané wase-Senegal.
I-Chelsea nayo izodlala ngaphandle konozinti wayo ohamba phambili u-Edouard Mendy wase-Senegal.
Abadlali be-Afcon kulindeleke ukuthi baphuthelwe okungenani amasonto amabili emidlalo yebhola lezinyawo kwi-Premier League kanye nemidlalo ye-FA neye-Carabao Cup.
Yonke imidlalo izodlalwa e-London phakathi nesonto. Kuzodlalwa umlenze wokuqala owandulela owamanqamu we-Carabao Cup phakathi kwe-Chelsea ne-Tottenham Hotspur ngoLwesithathu. I-Arsenal izokwamukela i-Liverpool ngoLwesine ebusuku.
➤ Ngemuva kwempelasonto yokuqala ka-2022 yebhola likanobhutshuzwayo ku-Premier League i-Manchester City ihamba phambili ngamaphuzu angu-10. Kanti futhi iyona ehamba phambili kumbango wesicoco ngemuva kokudlala ngokulingana ngamagoli amabili kwamabili emdlalweni we-Liverpool ne-Chelsea e-Stamford Bridge.
Igoli lokuwina elishaywe uRodri lisize i-Manchester City ukuthi inqobe ngegoli elilodwa eqandeni ibhekene ne-Arsenal. I-Manchester City ephambili kwiligi ingelinye lamaqembu amabili kuphela emaqenjini ayisikhombisa ahamba phambili angazange alahle amaphuzu kule mpelasonto.
Igoli likaDavinson Sanchez alishaye ngekhanda lenze i-Tottenham Hotspur esendaweni yesithupha yathola amaphuzu amathathu ngesikhathi ibhekene ne-Watford, kwathi i-West Ham esendaweni yesihlanu yahlulwa i-Crystal Palace. I-Manchester United esendaweni yesikhombisa ihlulwe ngegoli elilodwa eqandeni ngesikhathi idlala ekhaya ibhekene ne-Wolves ngoMsombuluko ebusuku.