Igagasi lesithathu selifikile ngokusemthethweni

Njengoba kunezibalo ezintsha zabantu abathelelekile abayizi-9,147 ezibikiwe ezweni lonke ngoLwesine, iNingizimu Afrika isihlaselwe igagasi lesithathu lokhuvuthe ngokusemthethweni, ngokusho kwe-National Institute for Communicable Diseases.

Isazi sezibalo zoKhuvuthe uRidhwaan Suliman uthe inani labantu base-Gauteng ngoLwesine linyuke laya kwabayizi-5,595 – u-61% wamanani esizwe – okuyizibalo ezithusa kakhulu emlandweni.

“Izinsuku ezimbili zokugcina e-Gauteng zibukeka zisabisa,” kubhala uSuliman ku-Twitter. “Kube noshintsho olukhulu.”

Njengoba i-Gauteng iyisizinda segciwane, izibalo zabantu abahaqwa igciwane linyuka kakhulu kwezinye izifundazwe. Zikhuphuke ngo-87% KwaZulu-Natali; zakhuphuka ngo-51% eNtshonalanga yeKapa; zakhuphuka ngo-49% eMpumalanga yeKapa; zakhuphuka ngo-43% e-Limpopo.

Isithombe nakwamanye amazwekazi sibukeka kabi. UDkt Matshidiso Moeti, umqondisi wesifunda se-World Health Organisation e-Afrika, uthe lolu bhubhane lukhuphukela phezulu emazweni ayi-14. I-Uganda iqophe ukunyuka kwamaphesenti ayi-131% abantu abahaqwa igciwane njalo ngeviki kuze kwaba ngesonto eledlule. Uthe kodwa ukuthunyelwa kwemithi yokugoma emazweni ase-Afrika kusamile kancane.

Khonamanjalo, uMengameli waseMelika uJoe Biden umemezele ngoLwesine ukuthi iMelika izonikela ngemithi yokugoma emisha eyizigidigidi ye-Pfizer emazweni angama-92 asathuthuka.

Lezi zindaba zamukelwe nguJohn Nkengasong, inhloko ye-Africa Centers for Disease Control and Prevention, okubize ngokuthi kumele sikujabulele futhi wanxusa bonke abalingani bamazwe omhlaba ukuthi basukume.

“Ngicela nibe sohlangothini oluhle lomlando ngoba umlando uzokukhumbula lokhu.”

Scrolla World Cup Quiz