Lubhalwe nguDoreen Mokgolo
- I-Ekurhuleni ithathela inkampani i-Syntell izinyathelo zomthetho ngezinsolo zokubambezela ukuphuma kwabo, ukugodla imininingwane, kanye nokuputshuza ukuxhumana kwangaphakathi.
Umasipala uphenya izinkokhelo ezingekho kanye nokucutshungulwa kwenhlawulo engagunyaziwe ngemuva kokuphela kwenkontileka ka-Syntell.
Imininingwane eyimfihlo yabashayeli abakhokhiswa inhlawulo phakathi kukaMandulo noZibandlela emigwaqeni yaseKurhuleni ingase ibe isizinda sempi yomthetho phakathi kukamasipala nenkampani eyayiqashelwe ukwenza izinhlawulo zomgwaqo ezikwl khompyutha, i-Syntell.
Umasipala usuqale uphenyo lwezomthetho ngenkampani i-Syntell nezikhulu okuthiwa zasebenzisana nenkampani ehlinzeka ngemisebenzi ukubambezela ukuphuma emahhovisi kamasipala, zaputshuza nezokuxhumana zangaphakathi kwabezindaba. Lesi sinyathelo esokuvula indlela yokuthi kumiswe izinhlelo zikamasipala.
I-Syntell yanikezwa umsebenzi wokuqopha ulwazi, ukukhipha izinhlawulo namasamanisi, nokuphatha izinkokhelo zemibandela emithathu elandelanayo.
Ubudlelwano phakathi kwalezi zinhlangothi zombili bube muncu ngoNhlangulana ngesikhathi umasipala wenqaba ukuvuselela inkontileka yabahlinzeki bezinsiza, njengoba izinhlelo zokuhlinzeka lezi zinsiza ngaphakathi zaziqhubeka.
Inkontileka yale nkampani yanwetshwa ezinye izinyanga ezintathu ukuze kuvuleke indlela yokuqeqeshwa kanye nenqubo yokunikezela, okwakuhlelelwe ukuthi yenzeke ngoMandulo 2024.
Kusolwa ukuthi inkampani izame ukubambezela ukuphuma kwabo ngokugodla imininingwane nokungaphumi emahhovisi kamasipala ukuze kuvuleke isikhala sabasebenzi abasha baze banikezwa amaphepha omthetho ngoZibandlela.
Ngalesi sikhathi umasipala ubungakazimisi izinhlelo zawo kanti kukholakala ukuthi i-Syntell ibisaqhubeka nokukhipha izinhlawulo yize bebengasenayo inkontileka nomasipala.
Ekhuluma nabezindaba ngoMsombuluko, isikhulu sezokwazisa kwamasipala uMoloko Monyepao sithe inkampani inqabile ukudlulisa imininingwane kuze izincwadi abazifakile ukuze bakhokheleke zilungiswe bese eyakhokhelwa.
“Iqeqebana lokuqala silithole ngoZibandlela kwathi elokugcina sanikezwa ngoMasingana kuyimanje siyahlola kuhlanganisa nezinhlawulo ezindala.
“Sisenodaba olusasele mayelana nokukhokha njengoba inkampani ehlinzeka ngemisebenzi yiyona eyenze lokho nge-PayCity.
“Inkampani isaqhubeka nokukhipha ama-SMS aya kumakhasimende. Okwamanje asazi ukuthi i-PayCity isasikweleta malini – sidonsa kanzima ukubuyisana futhi sesisungule uhlelo lwezomthetho ukuze siqonde ukuthi kwenzekani kwenye yemali,” usho kanje.
Ibamba leNhloko yamaPhoyisa uJulius Mkhwanazi lithe ngeke bavumele imali yeDolobha ukuthi ilawulwe ngumuntu othile abangamazi.
Esithombeni esingenhla: Ibamba leNhloko yamaPhoyisa uJulius Mkhwanazi, imenenja yedolobha u-Imogen Mashazi kanye no-MMC wezokuPhepha koMphakathi, uSizakele Masuku.
Umthombo: Doreen Mokgolo