Lubhalwe nguMichael Madyira
Kube isiqalo esingesihle kumqeqeshi weKaizer Chiefs uMolefi Ntseki njengoba ezakhe zibambane ngo 0-0 neChippa United emdlalweni wokuvula we-PSL enkundleni yezemidlalo iMoses Mabhida Stadium ngeSonto.
Lezi zinkunzi zase-Soweto kubukeka sengathi ziqale lapho zigcine khona ngesizini edlule kulandela ukuhluleka ukuthola igoli, yize uNtseki eqalise abagadli oRanga Chivaviro noChristian Saile Basomboli.
Yize engakahlangani kahle kodwa Amakhosi akhombise ukuthuthuka kancane ngeSonto.
Kodwa iChippa ibuyele e-Gqeberha ithwele ithemba elikhulu ngemuva kokuphumelela ukubamba izikhondlakhondla zebhola lakuleli.
UNtseki uqale ngabadlali bakhe abasha uGiven Msimango, uThatayaone Ditlhokwe, u-Edson Castillo noChivaviro.
Abanye abadlali abasha uTebogo Potsane noMduduzi Mdantsane bangene esiwombeni sesibili.
Nomqeqeshi weChippa uMorgan Mammila naye ufake abadlali abasha okubalwa u-Augustine Mulenga noGoodman Mosele.
Ithuba lokuqala lokushaya igoli kulo mdlalo liqhamuke ngemuva kwemizuzu engu-17 ngesikhathi umgadli weChiefs uMduduzi Shabalala eshaya ibhola eliphume eceleni kwepali.
UNkosingiphile Ngcobo uzame ukugadla ekude ngemuva kokubona ukuthi unozinti weChippa, uStanley Nwabali uphumile epalini.
Umdlali wasesiswini weChilli Boys uRonaldo Maarman ucishe wathola igoli ngomzuzu ka-65 kodwa unozinti weChiefs uBrandon Petersen wasebenza.
Sekusele imizuzu eyishumi, uYusuf Maart ubukele ngokudumala u-Ayabulela Konqobe evimba ibhola lakhe ebelibonakala njengegoli.
Izinhlangothi zombili zibonakale zinethezekile ngokuqeda ngokulingana ekugcineni.
Esithombeni esingenhla: Umgadli weKaizer Chiefs, uRanga Chivaviro ezama ukududula u-Azola Ntsabo weChippa United.
Umthombo wesithombe: Kaizer Chiefs