Menzi Magubane
IKaizer Chiefs izodlala nompetha abasanda kuthweswa isicoco se-DStv Premiership iMamelodi Sundowns emqhudelwaneni we-MTN8 ngesizini ezayo.
Amakhosi anenebule i-TS Galaxy ngelilodwa eqandeni ukuze aqede endaweni ephezulu yesishiyagalombili kowamanqamu wesizini ka-2020/21 ngoMgqibelo ntambama.
Lokhu kukhulu kubalandeli beChiefs ababekezelele isizini ebuhlungu ngaphansi komqeqeshi uGavin Hunt.
Ukuphuma phambili kwabayisishiyagalombili kube ukuphela kwempumelelo iqembu ebelihlose ukuyithola ngemuva kokuxosha uHunt kwangena u-Arthur Zwane noDillon Shepard.
Laba bobabili basalelwe yimidlalo emibili kanti yomibili bayinqobile babeka usuku lweSundowns lomqhudelwano wokuvula isizini entsha. Khonamanjalo, iDowns inenebule iCape Town City ngamathathu eqandeni ukuphakamisa le ndebe ngesitayela.
Yize abaqeqeshi abasha beDowns bengakwazanga ukuphinda irekhodi leqembu lesizini edlule lokunqoba lo mqhudelwano, benze ngokwanele ukujabulisa abalandeli babo.
Lesi sicoco seligi sebesinqobe okwesine kulandelana okuyirekhodi le-Premier Soccer League – futhi alikho iqembu eselike lasinqoba amahlandla amane elandelana.
NgoMgqibelo i-Orlando Pirates iphinde yabeka indawo yayo yesithathu kwi-log table ngemuva kokudlala ngokulingana phakathi kwabo neTshakhuma Tsha Madzivhandila. IBucs manje izibekisele indawo kwi-CAF Confederation Cup ngesizini ezayo.
IGolden Arrows esendaweni yesine izohlala njalo ikhumbula ukuhlulwa yiChiefs ngoLwesithathu olwedlule okubenze belahlekelwe indawo ku-Confederation Cup. Abafana Bes’thende bebeyizintandokazi obekulindelwe ukuthi ziqede endaweni yesithathu nokuziqophela umlando ngokungenela ukudlala emqhudelwaneni wezwekazi okokuqala.
IChippa United esezansi kwe-log ayikwazanga ukukugwema okungenakugwenywa ngemuva kokubambana neSuperSport United. IChilli Boys manje sekuzodingeka idlale imidlalo yama-Promotion / Relegation Play-Offs uma izodlala ku-Premiership ngesizini ezayo.
IChippa yiqembu lokuqala emlandweni we-PSL ukudlala kwi-National Play-Offs okwesithathu.
Eminye imiphumela ye-Premiership
Golden Arrows 0-0 Stellenbosch; Swallows 1-1 Baroka; Orlando Pirates 0-0 Tshakhuma Tsha Madzivhandila; Black Leopards 1-1 Bloemfontein Celtic; Maritzburg United ingu 0-0 AmaZulu
Umthombo wesithombe: @mamelodisundowns