Menzi Magubane
IBanyana Banyana ingene kweyomkhumulajezi ye-CAF Women’s Africa Cup of Nations ngemuva kokunenebula i-Burundi ngo 3-1 ngoLwesine ebusuku e-Morocco.
Yize iphume phambili emdlalweni wayo wesibili ku-Group C, iBanyana inecala lokuyeka inqwaba yamathuba okushaya amagoli.
Umdlalo bekumele iwosonge ngesiwombe sokuqala ngemuva kokugeja okungenani amathuba amabili acacile. I-Burundi isindiswe ngunozinti wayo ngabe ishaywe ngenqwaba yamagoli.
IBanyana ithathe imizuzu engu-20 ukushaya amagoli. UThembi Kgatlana ushaye igoli lakhe lokuqala kulo mqhudelwano.
Kodwa-ke, iBurindi ishaye elokulinganisa ngemuva kwemizuzu eyishumi yegoli likaThembi. Ukaputeni u-Asha Djafari ushiye uNoko Matlou ngaphakathi ebhokisini esiza u-Aniella Uwimana odlule u-Andile Dlamini kwaba ngu 1-1 ngemuva kwemizuzu engu-30.
IBanyana isheshe yabuyisa amandla ngo-Amogelang Motau ophinde washaya igoli lakhe lokuqala kulo mqhudelwano okwenze kwaba ngu 2-1 ngemuva kwemizuzu engu-32.
Esiwombeni sesibili iBanyana iqhubekile nokulahla amathuba kanti u-Irakoze uqhubekile nobuqhawe ohlangothini lwe-Burundi. Kodwa ngomzuzu ka-52 wenze iphutha wadlalisa kabi uKgatlana unompempe wabiza iphenalthi.
ULinda Motlhalo, ongene esikhaleni somunye, ushaye iphenalthi eyenze iBanyana yahamba phambili ngo 3-1 kanti leli goli likhombise ifomu enhle yamantombazane kaDesiree Ellis.
I-Burundi iphumile ngemuva kokuhlulwa imidlalo emibili ilandelana.
Umthombo wesithombe: @iDiskiTimes