Lubhalwe nguMichael Madyira
Uhambo lweBanyana Banyana oluya e-Turkey kwiNdebe Yabesifazane Yase-Turkey luthole izibusiso zenhlangano ephethe ibhola emhlabeni i-Fifa.
Kuke kwaba nokungabaza ngalomqhudelwano ngesonto eledlule kulandela ukuzamazama komhlaba okubi kakhulu okuhlasele i-Turkey nezinye izingxenye zase-Syria, nokuholele ekumisweni okwesikhashana kwezemidlalo.
Kodwa kubikwa ukuthi i-Fifa ivumele ukuqhubeka kwalo mqhudelwano. Bekuzodlala amaqembu esizwe angu-12, kodwa abasingethe imidlalo, i-Venezuela kanye ne-Jordan sebephumile.
UDesiree Ellis neqembu lakhe bafike ezweni lase-Turkey ngoLwesithathu ukuzodlala kulo mqhudelwano obekuhlelwe ukuthi uqale ngoMsombuluko.
“I-South African Football Association ixoxisane nabaningi ngaphambi kokuvumela iBanyana Banyana ukuthi iye e-Turkey,” kusho i-SAFA esitatimendeni.
“Lokhu kulandela ukuzamazama komhlaba okudale umonakalo omkhulu kwashona abantu abaningi, abanye balimala kakhulu futhi kubikwa nokuthi kukhona nabasadukile e-Turkey nase-Syria engumakhelwane. Inhlangano ephethe ibhola emhlabeni i-Fifa iphinde yanikeza imvume yokuqhubeka kwalo mqhudelwano encwadini ebhalelwe bonke ababambe iqhaza mhla ziyishumi kuNhlolanja 2023.”
IBanyana izodlala umdlalo wayo wokuqala ne-Uzbekistan ngoMgqibelo.
Eminye imidlalo kuzofanele ihlelwe kabusha futhi elakuleli lizothola izimbangi ezimbili ezintsha kwabanye abazobamba iqhaza okubalwa i-Bulgaria, i-Estonia, i-Kosovo, i-Hong Kong, i-North Macedonia, i-Slovenia ne-Zambia.
INdebe yabesifazane yase-Turkey izodlalelwa e-Antalya engazange ithinteke ngesikhathi kuzamazama umhlaba.
IBanyana izosebenzisa lo mqhudelwano ukulungiselela iNdebe yoMhlaba ka-2023 ye-Fifa ezosingathwa ngokuhlanganyela kwe-Australia ne-New Zealand kusukela ngomhlaka-20 kuNtulikazi kuya kumhlaka-20 kuNcwaba.
Elakuleli liku-Group G kanye ne-Italy, i-Argentina ne-Sweden kanti lokhu kuzobe kungokwesibili bebonakala eNdebeni yoMhlaba.
Isithombe esingenhla: Abadlali beBanyana bezilolonga
Umthombo wesithombe: Banyana Banyana