Lubhalwe nguMichael Madyira
IBanyana Banyana izodlala umdlalo wobungani nompetha base-Europe i-England ngomhlaka-29 kuMfumfu e-Coventry.
Ngemuva kokuphuthelwa imidlalo yama-Olympics ka-2024, iBanyana izobhekana ne-England ukuze ilungele i-2025 Women’s Africa Cup of Nations (Wafcon) e-Morocco ngoNtulikazi.
Umqeqeshi uDesiree Ellis uthe: “Ngemuva kokudlala imidlalo emibili yobungani ne-Senegal ngoNhlangulana, leli yithuba elihle lokuthi sizilungiselele i-Wafcon. Ukubhekana ne-England kuzosivivinya ngenye indlela. Siyethemba ukuthi abalandeli bethu base-UK bazoseseka.”
IBanyana yagcina ukudlala e-UK ngoMfumfu ka-2022 ngesikhathi ihlulwa yi-Australia ngamagoli amane kwelilodwa e-London.
Sekuphele iminyaka engu-14 bagcina ukudlala ne-England abayishaya ngegoli elilodwa eqandeni ngoNhlolanja ka-2010.
I-England iphinde yaphuthelwa kuma-Olympics ka-2024 nakuba yayingompetha base-Europe.
Womabili amaqembu anethemba lokuthuthuka futhi adlule ekuphoxekeni kwawo kuma-Olympics.
Isithombe esingenhla: Abadlali beBanyana Banyana.
Umthombo: Banyana Banyana