Lubhalwe nguBuziwe Nocuze
U-Ayabulela Nofemele ongumthandi wezincwadi oneminyaka engu-22 waseKapa, ujabule kakhulu ngokwanda kokusekwa akutholile ngemva kokuba i-Scrolla.Africa ishicilele udaba ngaye nebhizinisi lakhe.
U-Ayabulela waqala ukudayisa izincwadi emgwaqeni ngoba wayehlangana nabantu abaningi ababethanda ukufunda kodwa ababengakwazi ukufinyelela kalula ezitolo zezincwadi.
Ubonge i-Scrollla.Africa ngokushicilela udaba lwakhe.
“Ngemuva kokuthi ngidume emphakathini ngodaba ulubhalwe i-Scrollla.Africa ku-inthanethi, kuyangijabulisa ukusho ukuthi amakhasimende ami anyukile, futhi bengilokhu ngibuzwa imibuzo eminingi,” kusho u-Ayabulela.
“Kuyangijabulisa ukuhlonishwa nokukhuthazwa. Ngiyabonga kakhulu, futhi sengathi ningaqhubeka nibhale izindaba ezinhle. Ngiyohlala ngiyibonga i-Scrollla.Africa,” kusho yena.
U-Ayabulela onephupho lokuzakhela umtapo wolwazi ekhaya, udayisa izincwadi ngamanani aphansi ngezimpelasonto eThembokhwezi Square eMandalay kusukela ngo-10 ekuseni kuya ku-5 ntambama.
Ngemuva kokushicilelwa kodaba lwakhe, baningi abantu abamthintayo mayelana nezinhlobo zezincwadi azithengisayo.
“Ngifuna ukwenza izincwadi zitholakale kalula futhi ngikhuthaze abantu, ikakhulukazi intsha, ukuthi ibambe iqhaza ezintweni ezifana nokufunda, izinkulumo-mpikiswano, nokuxoxisana ngezinto ezithinta umphakathi,” usho kanje.
“Ngibathumelela izithombe zezincwadi ezitholakalayo njengoba nginezincwadi ezihlukene. Sibe sesihlela umhlangano endaweni yomphakathi ukuze kulethwe izincwadi. Angithengiseli kuphela abantu baseMandalay. ”
U-Ayabulela uthe iningi lamakhasimende akhe ngabesifazane.
“Nginamadoda athenga izincwadi, kodwa abathengi abaningi abesifazane,” usho kanje.
U-Ayabulela ungamthola ku-Facebook.
Izincwadi zakhe zibiza kusuka ku-R45 kuya ku-R85, azikho ezibiza ngaphezu kuka-R100.
UThembisa Shete (45) uthole ngebhizinisi likaNofemele nge-Scrollla.Africa.
“Kungijabulisile ukubona indaba yakhe kanye nesihloko esihle esimayelana neKapa. Abantu kumele bazi ukuthi idolobha aligcini nje ngobugebengu noma izinto ezimbi kodwa nabantu abafana no-Ayabulela abenza izinto ezinhle bakhona,” kusho yena.
Osesithombeni esingenhla: Ayabulela Nofemele.
Umthombo: Sithunyelwe