Lubhalwe nguRazeen Gutta
I-South African Sports Confederation and Olympic Committee (Sascoc) ijabule ngendlela iqembu laseNingizimu Afrika elenza kahle ngayo kuma-Olympics ase-Paris, njengoba linqobe izindondo eziyisithupha – okuphindwe kabili kusibalo sezindodo ezatholwa kuma-Olympics ase-Tokyo.
ULeon Fleiser, oyimenenja esezingeni eliphezulu ye-Sascoc futhi ongumholi weThimba laseNingizimu Afrika e-Paris, uthe uyaziqhenya ngempumelelo yabasubathi.
“Sijabule kakhulu ngokusebenza kweThimba laseNingizimu Afrika,” kusho uFleiser.
“Sathi sizokwenza kangcono kunase-Tokyo, futhi izindondo zethu siziphindaphinde kabili, ngakho siyaziqhenya kakhulu ngalokho abasubathi abasenzele kona.”
UFleiser uvumile ukuthi i-Sascoc ibifuna ukuhlinzeka ngokweseka okwengeziwe ngaphambi kwemidlalo yase-Paris kodwa yangakwazi ngenxa yezinkinga zemali.
Kodwa-ke, uma sibheka imidlalo ka-2028 e-Los Angeles, i-Sascoc ihlela ukuhlinzeka ngosizo olwengeziwe ukuqinisekisa ukuthi abasubathi bazilungiselele kangcono.
I-Sascoc izoqala ngokunikeza u-R2.1-million wemiklomelo kwabawine izindondo zase-Paris bese iqala uhlelo lokweseka ngokugcwele abasubathi eminyakeni emine ezayo.
“Manje kuqala umsebenzi onzima wase-LA,” kusho uFleiser.
Ubalule nokuthi i-Sascoc izovakashela e-LA ngoMfumfu ukuze iqale ukuhlela futhi izosebenzisana nazo zonke izinhlangano zezemidlalo ukuthola uxhaso nge-Bidvest ne-National Lotteries Commission ukuze abasubathi bathole ukwesekwa abakudingayo.
Esithombeni ngenhla: Ithimba lakuleli le-Relay eliwine indondo.
Umthombo: @laureussport