Lubhalwe nguRazeen Gutta
- Abaholi beSafa e-Western Cape bahlawuliswe u-R50 000 umuntu ngamunye ngokushaya indiva imiyalelo yenkantolo mayelana ne-Sasol Women’s League.
- Abaxhasi beligi i-Sasol bathi basazama ukuthola ukuthi konakelephi kodwa bazimisele ngebhola labesifazane.
I-South African Football Association (Safa) iphinde yaba senkingeni ngemuva kokuthi igatsha layo e-Western Cape liyishaye indiva imiyalelo emibili yenkantolo eyamaniswa ne-Sasol Women’s League.
Angu-14 amaqembu alolu phiko esewonke ayisa iSafa eNkantolo ePhakeme yase-Western Cape. Bathi usoseshini wehlulekile ukulandela imiyalelo yangaphambili yenkantolo, ikakhulukazi mayelana nokuthi ngobani abavunyelwe ukudlala kuligi kanye nemali abebeyikweleta, okuhlanganisa uxhaso lwezimali kanye nokukhokhwa kwemincintiswano.
Ngokwamaphepha asenkantolo, la amaqembu athi inhlangano yebhola, eholwa nguDanny Jordaan, ayizange izithobele izinqumo ezakhishwa ngokumelene nawo ngomhla ziyisithupha kuNdasa nangomhla zingama-24 kuNdasa.
ISafa yase-Western Cape, usihlalo wegatsha uTankiso Modipa, kanye nesikhulu esiphezulu esifundazweni uNadia Konstabel – ababalwe njengabamangalelwa bokuqala, owesibili nowesithathu – bahlawuliswe u-R50 000 umuntu ngamunye ngokudelela inkantolo.
“Owokuqala, owesibili nowesithathu ummangalelwa kumenyezelwe ukuthi bayawudelela lo myalelo wenkantolo wangomhla ziyisithupha kuNdasa ngo-2025 nomhla zingama-24 kuNdasa ngo-2025,” kufundeka lesi sinqumo.
Abaxhasi beligi i-Sasol bathi basaxhumana neSafa ukuze baqonde kahle ukuthi konakelephi.
“I-Sasol isaxhumana neSafa mayelana nezigigaba zakamuva kusoseshini,” kusho okhulumela iSasol uMatebello Motloung, ngokusho kwe-Sunday World.
“Njengabaxhasi abazinikele bebhola labesifazane eNingizimu Afrika, into esemqoka yethu iyaqhubeka nokweseka ukukhula nokuthuthukiswa komdlalo wabesifazane kanye nokuqinisekisa ukuthi abadlali namaqembu bathola izinsiza abazidingayo.”
Osesithombeni esingenhla: UDanny Jordaan
Umthombo: @bafanabafana