Lubhalwe nguZukile Majova
Amalungu e-ANC adla khezo lunye noJacob Zuma asaqhubeka nomkhankaso wawo ukuhlwitha amandla kuKhongolose.
Lolu hlangothi iningi lwabaholi balo abanukwa ngenkohlakalo lenza konke okusemandleni ukubuyela emandleni ukuze liqhubeke nokumosha nokukhwabanisa.
Kule minyaka emihlanu edlule lolu hlangothi lwe-ANC belugcwaneka amaJaji, okubalwa noMphathi wamaJaji uRaymond Zondo ngenhloso yokudicilela phansi isithunzi sekhomishini ebiphenya ngokulawulwa kombuso.
Uhlangothi lwe-ANC olwaziwa nge-Radical Economic Transformation (RET) luhambe phambili ekufuneni ukuthi uMengameli Cyril Ramaphosa ahoxiswe esikhundleni noma aphoqwe ukuthi ehle esihlalweni.
Umkhankaso walo usaqhubeka kusukela uRamaphosa ehlule uNkosazana Dlamini-Zuma engqungqutheleni ye-ANC yango-2017 njengoba ukunqoba kwakhe kwadala ikhefu ekuntshontshweni kwezimali ngendlela engakaze ibonwe.
Kusukela kudala ngaphambi kokuthi kudalulwe ukuthi imali elinganiselwa ku-$580,000 eyayifihlwe kusofa epulazini likaRamaphosa i-Phala Phala yantshontshwa esigamekweni sokubanjwa kwenkunzi ngo-2020, vele uhlangothi lwe-RET belifuna ukuthi uMengameli ehle esikhundleni.
Umzamo wokuqala kaRamaphosa wokuguqula i-ANC wachitha omunye wabaholi balolu hlangothi uNobhala-jikelele weqembu omisiwe u-Ace Magashule okusolwa ukuthi uyathinteka ecaleni lika-R250 million e-Free State,waphoqeleka ukuba ahoxe ngesikhathi egeza igama lakhe enkantolo.
Lesi sinqumo siphoqe abanye abaholi abahlukene ukuba baphume ezikhundleni zabo futhi abaningi abashiwo embikweni wokulawulwa kombuso bangase babhekane nenkinga efanayo uma bebekwa amacala ezinyangeni ezizayo.
Umkhankaso kaRamaphosa wokulwa nokwebiwa kwezimali zomphakathi ngabalingani bakhe usuqubule intukuthelo njengoba sekuqokwe abashushisi abasha abangaphezu kuka-1 000 ukuthi baqinise isikhundla kwi-National Prosecuting Authority.
Ingqungquthela ka-55 ye-ANC inikeza ithuba elihle lokuchitha uRamaphosa kanye nempi yakhe yokulwa nenkohlakalo.
Enkulumeni yakhe esidlweni sasebusuku se-Progressive Business Forum ngoLwesine ebusuku, uRamaphosa ufunge wagomela ukuthi uzoqhubeka nokulwa nenkohlakalo kuhulumeni wakhe.
Kule ngqungquthela uhlangothi lwe-RET luholwa ngowayenguNgqongqoshe wezempilo kuleli uDkt Zweli Mkhize owaxoshwa uhulumeni ngemuva kwezinsolo zokuthi uyathinteka ecaleni lika-R150 million lwe-Digital Vibes Communication.
Ingqungquthela yokukhetha ubuholi eqala namhlanje kulindeleke ukuthi ishube njengoba izithunywa ezingu-4 500 sezivunyelwe ukuqoka abanye abaholi esikhundleni sikaMengameli, iPhini likaMengameli, uSihlalo kazwelonke, uNobhala jikelele, iPhini likanobhala kanye nesikaMgcinimafa-jikelele.
Isithombe esingenhla ngesikaMengameli we-ANC uCyril Ramaphosa
Umthombo wesithombe: @MyANC