Celani Sikhakhane
UNgqongqoshe wezokuVakasha uLindiwe Sisulu ungaphansi kwenkulu ingcindezi yokuthi aqinisekise ukwethembeka kwakhe kulabo abeseka owayenguMengameli wezwe uJacob Zuma.
I-Radical Economic Transformation (RET) esola uSisulu ngokuhlulwa kukaNkosazana Dlamini-Zuma engqungqutheleni yokukhetha ubuholi be-ANC e-Nasrec ngonyaka ka-2017, manje isimbona njengomdidiyeli obalulekile emzamweni wayo wokukhipha uMengameli uCyril Ramaphosa esikhundleni.
Amasosha e-RET akholelwa ukuthi wanikeza uRamaphosa indlela ecacile yokuba nguMengameli ngokuthatha amavoti kuDlamini-Zuma.
USisulu uphose isigqoko sakhe eringini engenela umjaho wokuba uMengameli ngaphambi kwengqungquthela yesi-54 yokukhetha ubuholi be-ANC ebise-Nasrec.
URamaphosa uthole amavoti angu-2,440 kwathi uDlamini-Zuma wathola angu-2,261 kuphela.
Manje amanye amalungu e-RET KwaZulu-Natali athi bekuyizifiso zikaSisulu zokuba abe nguMengameli okuholele ekutheni kuhlulwe uDlamini-Zuma.
Bathi uSisulu uhlukanise phakathi ivoti labesifazane, okunikeze uRamaphosa ithuba eliqondile lokungena esikhundleni sobuMengameli.
Le ngxoxo ephutshukele kwa-Scrolla.Africa ibibanjwe abangani bakaJacob Zuma ku-WhatsApp.
Omunye obebambe iqhaza uthe sekuyisikhathi sokuthi uSisulu aphumele obala ngoba akakaze asho ukuthi uyingxenye yabo kodwa uhlangothi lwe-RET luphakamisa igama lakhe.
Abanye babuze ukuthi uzokwazi yini ukubuyisa umhlaba nokuchibiyela isigaba sesi-25 somthethosisekelo ukuze kuthathwe umhlaba ngaphandle kwesinxephezelo.
“Maqabane kubukeka sengathi njenge-RET, ithina esiphusha uNksz uSisulu kodwa akakaze aphumele obala azomemezela ngobudlelwano bakhe nathi. Kunzima lokhu bakwethu ngoba wasikhaphela e-Nasrec noNDZ wehlulwa ngenxa yakhe,” kusho omunye obebambe iqhaza.
UNkosentsha Shezi ongumpetha we-RET ophinde abe ingxenge yaleli qembu lika-WhatsApp utshele i-Scrolla.Africa ukuthi kuyiqiniso ukuthi uSisulu waholela ekutheni kuhlulwe uDlamini-Zuma e-Nasrec kodwa “usezikhombisile ukuthi ungumholi abamdingayo kwi-ANC.”
“Siyazi ukuthi uSisulu wenzani ngonyaka-2017 ebhekene noDlamini-Zuma kodwa usikhombisile ukuthi uyingxenye ye-RET namaqabane afana no-Ace Magashule nabanye.
Uphinde wathatha isibindi sokubhekana noRamaphosa obulala i-ANC. Ngaphandle kwakho konke lokhu kumele ukuqonde ukuthi amagatsha e-ANC awakanqumi ukuthi ngubani ozoba nguMengameli, njengoba kungewona wonke umuntu ozokhethwa ukuthi abe nguMengameli wenhlangano,” kusho uShezi.
.
