Lubhalwe nguCelani Sikhakhane
Kuhlukene phakathi i-National Freedom Party mayelana nesiphakamiso sokungabethembi ubuholi bukaNdunankulu waKwaZulu-Natal, uMnuz Thami Ntuli, esivezwe ngumholi we-MK Party, iNkosi Phathisizwe Chiliza.
UMengameli we-NFP u-Irvin Barnes uyaseseka isiphakamiso se-MK Party sokususa uNdunankulu waseKZN uThami Ntuli, kodwa umholi wesifundazwe uMbali Shinga uthi usameseka.
Inkosi uPhathisizwe Chiliza ifuna uSomlomo waseKZN abize umhlangano oyisipesheli engakapheli amasonto amabili ukuze kuvotelwe ukukhipha uNdunankulu uNtuli.
Iqembu le-National Freedom Party lihlukene phakathi ngesiphakamiso sokungabethembi ubuholi bukaNdunankulu waKwaZulu-Natal uMnuz Thami Ntuli.
Lesi siphakamiso sifakwe ngumholi we-MK Party esiShayamthetho eKZN, iNkosi Phathisizwe Chiliza, othi uNdunankulu wehlulekile ukuhola isifundazwe ngendlela.
Sekuqubuke uqhekeko phakathi kukaNgqongqoshe wezokuThuthukiswa koMphakathi uMbali Shinga noMengameli we-NFP u-Irvin Rowan Barnes. UBarnes ucheme ne-MK Party eseka ukuthi kukhishwe uNtuli, kanti uShinga ohola i-NFP e-KZN ume ngokuqinile ngemuva kwakhe.
UChiliza uthe uhulumeni wesifundazwe ngaphansi kobuholi bukaNtuli ulahlekelwe indlela wabe esenxusa uSomlomo eKZN ukuthi abize isigungu esiyisipesheli engakapheli amasonto amabili ukuze avotele lesi siphakamiso.
Lesi senzo siza ngemuva kwamasonto iSilo uMisuzulu kaZwelithini siphumele obala sancoma uNtuli ngesikhathi kugujwa uSuku lweSilo uShaka KwaDukuza, sathi uMbuso kaZulu usebenzisana naye kahle.
Isiphakamiso sikaChiliza senyuse ukungezwani kwezepolitiki kuHulumeni Wobumbano Lwezifundazwe. I-ANC eKZN isinxuse ukuba kube nomhlangano ophuthumayo ne-IFP ukuze kulungiswe izingxabano ezikhulayo phakathi kwamadlelandawonye.
Ukungaboni ngaso linye kulandela izikhalo zophiko lwentsha lwe-ANC, lusola uNgqongqoshe we-IFP Cogta uMfundisi uThulasizwe Buthelezi ngokuxhaphaza omasipala abaholwa yi-ANC.
I-MK Party inezihlalo ezingu-37 esiShayamthetho saseKZN. Njengoba i-EFF inezihlalo ezimbili, inamavoti angu-39 bashoda ngezingu-41 ezidingekayo ukuze kukhishwe uNtuli.
Esithombeni esingenhla: UNgqongqoshe wezokuThuthukiswa koMphakathi KwaZulu-Natal, uMbali Shinga, ophikisana nesiphakamiso sokufuna kuphume uNdunankulu uThami Ntuli.
Umthombo wesithombe: Uhulumeni waseKZN