Dylan Bettencourt
I-National Basketball Association (NBA) inohlelo lokufinyelela kubantu base-Afrika abasebenzisa ama-smartphone ukuze bandise ukuqwashisa ngezemidlalo ezwenikazi lonke.
Usozigidigidi uPrem Watsa utshale imali engu-R15 billion kulo msebenzi, okuhloswe ngawo ukuthi izwekazi elinentsha emhlabeni lingene kulo mdlalo.
Abatshalizimali abaningi sebesekele lobu buchwepheshe, okuhlanganisa nowayenguMengameli waseMelika, uMnu Barack Obama, owazalelwa e-Kenya. Lo msebenzi uphinde wesekwa nguForest Whitaker owathola indondo ye-Oscar ngokudlala indawo yomashiqela wase-Uganda u-Idi Amin ngo-2006 kwifilimu ethi-The Last King of Scotland.
UTope Lawani, oyisikhulu esiphezulu sephrojekthi yalo msebenzi i-Helios Fairfax, uthe maningi amathuba okukhula ezwenikazi lase-Afrika.
“Ezintweni eziningi utshalomali luhlanganisa amanye amaphuzu ebesiwaveza mayelana nezibalo zabantu kanye nobuchwepheshe,” kusho uLawani.
ULawani uthe ukwanda kokusetshenziswa kwama-smartphone ezwenikazi lonke kudonse amehlo abo.
“Ubuchwepheshe obuthengekayo buye benza izwekazi laba imakethe ebaluleke kakhulu ekusetshenzisweni kokuqukethwe nemikhiqizo,” usho kanje.
Inhloso yabo ngalolu hlelo akukhona nje ukuthola abantu abaningi base-Afrika abazobukela lo mdlalo kodwa ukuthola abantu abaningi base-Afrika abazodlala kwi-NBA.
“Uma ubheka i-NBA eminyakeni engu-20 edlule, kungenzeka ukuthi yayinabadlali ababili, noma mhlawumbe abathathu ababedabuka e-Afrika. Namuhla isibalo singaphezu kuka-50,” kusho uLawani.
I-NBA isivele inobudlelwano obukhulayo ne-Afrika njengoba umqhudelwano waminyaka yonke ubanjelwa edolobheni lase-Afrika, lapho abadlali abahamba phambili beligi bekhombisa amakhono abo.
U-Adam Silver, ukhomishana we-NBA usevele wadalula izinhlelo zokwakha ingqalasizinda efana namahhovisi, izinkantolo kanye nezinkundla zemidlalo i-Afrika yonkana.
Le ligi iphinde ibambisane ne-Basketball League Africa, umqhudelwano onamaqembu angu-12 aqhamuka emazweni ahlukene ase-Afrika. Iligi isizoqala isizini yesibili ngemuva kwesizini yokuqala ebe yimpumelelo.
Abasakazi bakuleli i-SABC ne-SuperSport baqale ukukhombisa imidlalo ye-NBA bukhoma ngonyaka odlule njengoba imakethe ye-NBA ikhula e-Afrika.
Umthombo wesithombe: @TheBorgenProject
.
