Lubhalwe nguCelani Sikhakhane
Kuxoshwe uMnuz Arthur Zwane njengoNobhala-Jikelele weqembu loMkhonto weSizwe (MK).
Usolwa ngokwehluleka ukufaka amaphepha eqembu enkantolo ngokumelene ne-Independent Electoral Commission (IEC) mayelana nezinsolo zokuthi kukhwabaniswe amavoti ngokhetho lwangomhlaka-29 kuNhlaba.
Ukuhluleka kwakhe ukwenza lokho kuholele ekutheni iqembu lihoxise icala ebelilibhekise ku-IEC eNkantolo yoKhetho.
Imithombo ye-Scrolla.Africa idalule ukuthi uZwane waxoshwa ngomhlaka-27 kuNhlangulana ngaphambi kwengqungquthela ye-MK eyayise-Bela Bela, e-Limpopo.
“UDuduzile Zuma [indodakazi yowayengumengameli uJacob Zuma] ubethukuthele egane unwabu,” kusho umthombo. “Ubefuna ngisho nokumshaya uZwane ngokwehluleka ukufaka amaphepha enkantolo.
“UZwane usolwa nangokuzwana nabaholi be-ANC. Ubonakala kuwo wonke ama-WhatsApp group e-ANC.”
Kusolwa nokuthi uZwane wadelela umyalelo womholi we-MK, uMnuz Jacob Zuma, wokuba eseke uPhumlani Mfeka we-Injeje yabeNguni Civic Organisation njengoNdunankulu e-KZN.
Esikhundleni salokho uZwane kuthiwa utshele amalungu e-MK esiShayamthetho sase-KZN ukuthi aphakamise iPhini likaNdunankulu kaZulu, iNkosi uPhathisizwe Chiliza.
UZwane udalule ukuthi wesula esikhundleni sokuba ngunobhala-jikelele we-MK ngenxa yokuzibophezela kwezamabhizinisi kodwa waqhubeka nokuba yilungu leqembu.
Imizamo ye-Scrolla.Africa yokuxhumana noZwane ngocingo nangemiyalezo ayiphumelelanga.
Okhulumela iqembu le-MK uNhlamulo Ndlela naye ubengakaluphenduli ucingo lwethu ngesikhathi sokushicilela udaba.
Esithombeni ngenhla: Uxoshiwe uNobhala-Jikelele we-MK u-Arthur Zwane.
Umthombo: X