Dylan Bettencourt
I-Manchester City ifake umlenze owodwa kowamanqamu we-Uefa Champions League ngemuva kokushaya i-Real Madrid ngo 4-3, ekhaya. Kodwa ukushaya amagoli amathathu kweMadrid kwenza kube nzima ukuqagela ukuthi iyozala nkomoni eSpain, uma iCity isivakashele iMadrid.
I-City ibibukeka idlondlobala esigabeni sokuqala somdlalo kanti izithole ihamba phambili ngamagoli amabili eqandeni ngemuva kwemizuzu eyishumi nje vo.
U-Kevin de Bryune ushaye ibhola ngekhanda ngendlela enhle kakhulu kusanda kuqala umdlalo.
Lo mdlali wase-Belgium uphinde wenza kahle ngesikhathi esiza uzakwabo uGabriel Jesus oshaye igoli lesibili elenze i-City yahamba phambili ngo 2-0.
I-City ifike emdlalweni iyizintandokazi.
Ukugeja amathuba kanye namaphutha okuzivikela kuyilimazile i-City njengoba uKarim Benzema ethole igoli lokwenza kwaba ngu 2-1, ngaphambi kokuthi kuyiwe ekhefini.
Abafana bakaPep Guardiola bebebukeka benamandla ekuqaleni kwesiwombe sesibili kodwa bahlulwa amathuba.
UPhil Foden ushayele i-City igoli lesithathu.
Ompetha be-Premier League abazange bavumele amathuba abalahlekele ukuthi abaphazamise njengoba beqhubeka nokufaka ingcindezi kwi-Madrid.
Leyo ngcindezi igcine isithele izithelo njengoba uBernardo Silva ethole igoli okwenza i-City yahamba phambili ngamagoli amane kwamabili.
Kodwa i-Madrid nayo ilwile yathola igoli lesithsthu.
I-Los Blancos ithole iphenathi ebekwe enethini uBenzema washaya igoli lakhe lesi-41 kule sizini.
I-City izozizwa iphoxekile ngokuthi ayiyi e-Spain, kodwa ngemuva kokuthi la maqembu womabili edlale imidlalo yakudala ye-Champions League lokhu kuza njengokuzilungiselela okuhle emlenzeni wesibili othokozisayo wabalandeli abangathathi hlangothi.
Umthombo wesithombe: @Goncalo_Diass17