Lubhalwe nguCelani Sikhakhane
Abaphathi be-Kaizer Chiefs sebenqume ukuphephela kwaShembe ukuyothola izibusiso zokunqoba iNedbank Cup njengoba leli qembu sekuphele iminyaka eyishumi lagcina ukuqukula indebe.
UKaizer Motaung Junior, oyiSporting Director yeChiefs, uyena obehola ithimba eliye eBuhleni, eNanda, eNyakatho yeTheku ngoMgqibelo.
Umholi wakwaShembe Inkosi Mduduzi Nyazilwezulu Shembe, ibathandazele yaphinde yabafisela okuhle njengoba bezotholana phezulu neMamelodi Sundowns, eLoftus Stadium, ePitoli, ngeSonto ngo-6 ntambama.
Amakhosi akuwahambeli kahle kule sizini njengoba ezithola esendaweni yesishiyagalolunye kwilogi yeBetway Premieship.
Umqeqeshi uNasreddine Nabi unengcindezi yokugcina umsebenzi wakhe kuleli qembu laseNaturena, futhi kukhona abalandeli asebelahle ithemba ngaye.
Nakanjani ukunqoba iNedbank Cup kungayishintsha imiqondo yabalandeli baMakhosi asebethandabuza amava okuqeqesha kaNabi.
Komunye umdlalo owandulela owamanqamu kuzotholana phezulu i-Orlando Pirates neMarumo Gallants e-Orlando Stadium, ngeSonto ngo-3 ntambama.
IBucs iyona evikela iNedbank Cup eyiqukule ngemuva kokushaya iSundowns kowamanqamu ngesizini edlule.